Nimisha Priya : भारतीय नर्स निमिषा प्रियाला ‘येमेन’मध्ये दिलासा, फाशीची शिक्षा पुढील आदेशापर्यंत स्थगित

या प्रकरणात सुरुवातीपासूनच भारत सरकारकडून मदतीसाठी सर्वतोपरी प्रयत्न करण्यात येत आहेत. निमिषा प्रियाच्या कुटुंबाला दुसऱ्या पक्षाशी परस्पर सहमतीने तोडगा काढण्यासाठी काही वेळ मिळावा यासाठी प्रयत्न करण्यात येत असल्याची माहिती सूत्रांनी दिली आहे. या संदर्भातील वृत्त टाईम्स ऑफ इंडियाने दिलं आहे.

भारतीय नर्स निमिषा प्रिया हिची २०१७ मध्ये तिचा येमेनमधील व्यावसायिक भागीदार तलाल अब्दो मेहदी याची हत्या केल्याच्या प्रकरणात निमिषा प्रिया दोषी ठरली आहे. त्यामुळे या हत्या प्रकरणात निमिषा प्रिया ही सध्याही शिक्षा भोगत असून तिला या प्रकरणात मृत्युदंडाची शिक्षा झालेली आहे. तिला १६ जुलै रोजी फाशीची शिक्षा दिली जाणार होती. मात्र, आता ही फाशीची शिक्षा पुढील आदेशापर्यंत पुढे ढकलण्यात आली आहे. दरम्यान, निमिषा प्रिया हिची फाशी टळण्यासाठी भारताकडून प्रयत्न करण्यात येत होते.

नेमकं प्रकरण काय?

निमिषा प्रिया ही २००८ साली कामानिमित्त येमेन येथे गेली होती आणि तिचे कुटुंब केरळमध्येच होते. तिने २०१५ साली मेहदी याच्याबरोबर स्वतःचं क्लिनिक सुरू करण्यापूर्वी तिने इतर अनेक रुग्णालयांमध्ये काम केलं होतं. मेहदी हा तिचा स्थानिक पार्टनर होता. येमेनमध्ये पार्टनर म्हणून स्थानिक व्यक्तीला उद्योगात बरोबर घेण्यासंबंधीचा कायदा आहे.

येमेनमध्ये क्लिनिक सुरू करण्यासाठी निमिषा प्रिया हिने तलाल अब्दो मेहदीला बरोबर घेतलं. मात्र, त्यानंतर दोघांमध्ये वाद झाले आणि निमिषा प्रिया हिने मेहदीवर पैशांचा अपहार केल्याचा आरोप केला. यामधून दोघांमध्ये वाद झाले. त्यानंतर निमिषा प्रियाचा पासपोर्ट मेहदीने घेतला. पासपोर्ट परत घेण्यासाठी प्रियाने कथितपणे त्याला सेडेटिव्हजचे इंजेक्शन दिले. पण त्याचा ओव्हरडोस झाल्याने त्याचा मृत्यू झाला.

त्यानंतर येमेनमधून पलायन करण्याच्या प्रयत्नात असताना निमिषा प्रियाला अटक करण्यात आली. त्यानंतर स्थानिक न्यायालयाने निमिषा प्रियाला २०२० साली मृ्त्यूदंडाची शिक्षा दिली. तिच्या कुटुंबियांनी येमेनच्या सर्वोच्च न्यायालयात धाव घेतली आणि या निर्णयाला आव्हान दिलं होतं. पण २०२३ साली ही याचिका फेटाळण्यात आली. त्यानंतर तिला १६ जुलै रोजी फाशी देण्यात येणार होती. पण आता पुढील आदेशापर्यंत ही फाशी पुढे ढकलण्यात आली आहे.