Kolkata Rape Case Update : कोलकाताच्या आरजी. कार मेडिकल कॉलेजमध्ये एका प्रशिक्षणार्थी डॉक्टरवर बलात्कार करून तिची निर्घृण हत्या करण्यात आली. या घटनेचे देशभर तीव्र पडसाद उमटत असून विविध सामाजिक संस्थांकडून आंदोलन पुकारले जात आहे. तसंच, महिला सुरक्षेचा मुद्दा उपस्थित करून या रुग्णालयातील डॉक्टर आणि इतर कर्मचाऱ्यांनीही आंदोलन छेडलं होतं. परंतु, मध्यरात्री या आंदोलनात इतर जमावाने सहभाग घेऊन आंदोलनाला हिंसक वळण मिळालं. या घटेनेचे वर्णन करताना रुग्णालयातील परिचारिकांनी पोलिसांवर गंभीर आरोप केले आहेत. इंडियन एक्स्प्रेसने यासंदर्भातील वृत्त दिलं आहे. रुग्णालयाच्या आपत्कालीन इमारतीच्या तळमजल्यावर रात्री हिंसाचार झाला. या हिंसाचारात तोडफोड झाल्याने रुग्णालयातील काचा फुटल्या, वैद्यकीय उपकरणे खराब झाली, बेड तुटले, औषध खोल्यांमध्ये नासधूस झाली. १५ ऑगस्टच्या मध्यरात्रीनंतर शेकडो लोक रुग्णालयात पोहोचले. त्यांनी आंदोलकांचा पाठलाग करत त्यांच्यावर हल्ला केला. त्यानंतर ते आपत्कालीनच्या इमारतीत घुसले. तिथे लाठ्या आणि हातोड्यांचा वापर करून तळमजल्यावरील खोल्यांची तोडफोड केली. पोलिस त्यांच्या मदतीला आले नाहीत, असे आंदोलकांनी सांगितले. आम्ही दहशतीत आहोत “आमच्यावर मध्यरात्रीच्या सुमारास हल्ला झाला. पोलीस आमच्यापेक्षा वेगाने पळून गेले. गुंडांनी आमच्यापैकी काहींना मारहाण केली आणि परिसराची तोडफोड केली. आम्ही दहशतीत आहोत. त्यांनी आमच्यावर हल्ला करण्याचा प्रयत्न केला, परंतु आमचा निषेध करण्याची भावना अजूनही शाबूत आहे”, असं असे विरोध करणाऱ्या डॉक्टरांनी नाव जाहीर न करण्याच्या अटीवर सांगितले. कोलकाता आणि राज्यातील इतर शहरांत रिक्लेम द नाईट या मोहिमेअंतर्गत शेकडो महिला एकत्र जमल्या होत्या. नेमकं याच वेळी जमावाने धुडगुस घातला. आपत्कालीन इमारतीच्या चौथ्या मजल्यावरील सेमिनार रूममध्ये गेल्या आठवड्यात ३१ वर्षीय डॉक्टरचा मृतदेह सापडला होता. पोलिसांच्या म्हणण्यानुसार, गुरुवारी पहाटे इमारतीत घुसलेला जमाव या चौथ्या मजल्यापर्यंत गेला नाही. हेही वाचा >> Kolkata Rape Case : बॅरिकेट्स तोडले, खुर्च्या फोडल्या, जबरदस्तीने रुग्णालयात घुसण्याचा प्रयत्न; कोलकात्यातील रुग्णालयात मध्यरात्री जमावाचा धुडगूस! संपूर्ण रुग्णालयात हैदोस तळमजल्यावर, कार्डिओलॉजी आपत्कालीन विभाग, प्रवेश कक्ष, वैद्यकीय अधिकारी कक्ष, टेली-न्यूरो मेडिसिन कक्ष, परिचारिकांचा कक्ष आणि आपत्कालीन वॉर्डांची तोडफोड करण्यात आली. लाइफ सपोर्ट सिस्टिमसह अत्याधुनिक उपकरणांचे नुकसान झाले. चोरट्यांनी स्टोअररुममध्ये घुसून औषधे असलेली उघडी तिजोरी फोडली. ईएनटी विभागाचीही तोडफोड करण्यात आली. सर्व खोल्यांमध्ये डेस्कटॉप संगणक, लॅपटॉप, दिवे आणि पंखे तुटले. स्नानगृहे उद्ध्वस्त झाली. रुग्ण आणि त्यांच्या सेवकांसाठी असलेल्या खुर्च्या आणि बेडचीदेखील तोडफोड करण्यात आली. तोडफोड करत असताना आंदोलनस्थळी असलेले डॉक्टर म्हणाले, “गेल्या सहा दिवसांपासून आम्ही शांततापूर्ण आंदोलन करत आहोत. आमच्या मदतीला न आलेल्या पोलिसांना आम्ही मदतीसाठी हाक मारली. बदमाशांनी आम्हालाच लक्ष्य केले." या निषेधात सहभागी असलेली एक परिचारिका म्हणाली, “आम्ही काल रात्री असहाय होतो. आम्ही असे कसे काम करणार? प्रशासन आणि पोलिसांनी आमची सुरक्षा सुनिश्चित केली पाहिजे. ”
