चीनमधून अखेरच्या भारतीय पत्रकाराची हकालपट्टी

नवी दिल्ली : चीनमधून वार्ताकन करणाऱ्या अखेरच्या भारतीय पत्रकाराला महिना अखेरीस देश सोडून जाण्यास सांगण्यात आले आहे. या वर्षी चीनमध्ये भारताचे चार पत्रकार होते. एप्रिलमध्ये त्यापैकी दोन पत्रकारांचे व्हिसा गोठवण्यात आले आणि त्यांना चीनमध्ये प्रवेशबंदी करण्यात आली.गेल्या आठवडय़ात अन्य एका पत्रकाराने बीजिंग सोडले. आता तिथे उरलेल्या प्रेस ट्रस्ट ऑफ इंडिया या वृत्तसंस्थेच्या एकमेव पत्रकारालाही या महिन्याच्या अखेरीस चीन सोडण्यास सांगण्यात आले आहे. त्यांच्या व्हिसाची मुदत संपत असून ती वाढवून देण्यास चीनने नकार दिला आहे. त्यामुळे पुढील महिन्यापासून जगातील दुसऱ्या क्रमांकाची अर्थव्यवस्था असलेल्या देशामध्ये भारताचा एकही पत्रकार असणार नाही.