सोनम वांगचुक यांची खंत, “लडाखमध्ये लोकशाही अवतरली नाही तर सत्यमेव जयते ऐवजी मिथ्यमेव जयते…”

सोनम वांगचुक काय म्हणाले?

“माझी शुगर लेव्हल कमी झाली आहे त्यामुळे माझी तपासणी सुरु आहे. मी पाच दिवसांपासून अन्न घेतलेलं नाही. त्यामुळे हे होणारच आहे. उपोषणाच्या पाचव्या दिवशी अनेक लोक इथे आले होते. आता लडाखच्या समर्थनासाठी तुम्हीही पुढच्या रविवारी अनेक लोक येतील आणि उपोषण करतील. लडाखसारख्या भागाला कायमस्वरुपी राष्ट्रपती राजवटीमध्ये ठेवणं हे आम्हाला अपेक्षित नाही. सत्याच्या लढाईला सगळे साथ देतील असं मला वाटलं.”

मिथ्यमेव जयते हा नारा…

सोनम वांगचुक पुढे म्हणाले, “सत्यमेव जयते हे आपण म्हणतो त्यामुळे जर आमचा लढा सत्यासाठीच आहे. सत्याचा विजय झाला पाहिजे. अन्याय करणाऱ्या इतकाच तो सहन करणाराही जबाबदार असतो त्यामुळे मी आवाज उठवला आहे. खोटी आश्वासनं आता पुरे झाली.. मिथ्यमेव जयते म्हणजे असत्याचा विजय असो असं म्हणायची वेळ आपल्यावर येऊ नये म्हणून मी आवाज उठवला आहे. आत्तापर्यंत अनेकदा जाहीरनामे, वचननामे यामध्ये आश्वासनं देण्यात आली. मात्र लडाख लोकशाहीपासून वंचित आहे. त्यामुळे लडाखसाठीची लढाई आमच्यासाठी महत्त्वाची आहे. आत्ताचं सरकार हे प्रभू श्रीरामावर विश्वास ठेवणारं आहे त्यामुळे राम फक्त मूर्तीमध्ये नाही तर वचनपूर्ती करण्यात आहे हे त्यांना माहीत आहे. रघुकुल रिती सदा चली आयी प्राण जाये पर वचन न जायी.. हे सरकारला ठाऊक आहे. त्यामुळे आम्हाला आशा आहे की सरकार वचनपुर्ती करेल. पुढच्या रविवारी सगळ्या शहरांमधले लोक आम्हाला पाठिंबा देतील अशी आशा आहे” असं सोनम वांगचुक यांनी म्हटलं आहे.

नेमक्या मागण्या काय आहेत?

लडाखमध्ये लोकशाही यावी ही लडाखवासीयांची सर्वात मोठी मागणी आहे. त्यासाठी लडाखचा समावेश सहाव्या सूचीत केला जावा असं झालं तर लडाखला घटनात्मक सुरक्षा मिळेल. तसंच लडाखला पूर्ण राज्याचा दर्जा दिला जावा ही दुसरी मागणी आहे. अनुच्छेत ३७० असल्याने लडाखला घटनात्मक सुरक्षा प्राप्त झाली होती. आता मात्र ती परिस्थिती नाही. लडाखमधले कार्यकर्ते लडाखचा समावेश सहाव्या सूचीत करावा अशी मागणी करत आहेत. मॅगेसेसे पुरस्कार विजेते सोनम वांगचुक यांनी यासाठी उपोषण सुरु केलं आहे. त्यांचा व्हिडीओ सोशल मीडियावर व्हायरल झाला आहे. ज्यामध्ये रामाच्या वचनाची आठवण केंद्र सरकारला करुन देत आहेत.