Crime News : मध्य प्रदेश येथून गुन्ह्याचा एक अत्यंत धक्कादायक प्रकार समोर आला आहे. येथे एका २७ वर्षीय व्यक्तीने एका मित्रावर लिंगबदल शस्त्रक्रिया करण्यासाठी भाग पाडल्याचा तसेच त्यानंतर बलात्कार आणि धमकावल्याचा आरोप केला आहे. भोपाळच्या गांधी नगर पोलीस स्टेशनमध्ये या प्रकरणात झिरो एफआयआर दाखल करण्यात आला आहे. आता हा एफआयआर गुन्हा ज्या ठिकाणी घडला त्या नर्मदापुरम येथे हस्तांतरित करण्यात येणार आहे.
पोलिसांनी दिलेली माहिती आणि पीडित व्यक्तीने दिलेली तक्रार यानुसार, मूळ भोपाळच्या जवळ असलेल्या ओबेदुल्लागंज भागातील रहिवासी असलेल्या व्यक्तीची शुभव यादव याच्याशी मैत्री झाली. शुभम यादव हा नर्मदापुरम येथील रहिवासी आहे. बहि‍णीच्या सासरच्या घरी गेल्यानंतर या दोघांची भेट झाली. ते एकमेकांच्या जवळ आले आणि नंतर त्यांच्यात प्रेमसंबंध निर्माण झाले.
एनडीटीव्हीने पोलीस सूत्रांच्या हवाल्याने दिलेल्या वृत्तानुसार, २५ वर्षीय पीडित व्यक्ती हा भोपाळच्या ग्रामीण भागातील आहे आणि तो शुभम बरोबर शहरातील अशोक गार्डनर परिसरात भाड्याच्या घरात राहात होता. या काळात शुभमने त्या व्यक्तीबद्दल असलेल्या भावना व्यक्त करण्यास सुरूवात केली.
नेमकं काय घडलं?
पीडित व्यक्तीने दिलेल्या माहितीनुसार, काही महिन्यांपूर्वी शुभम डोकेदुखीचा त्रास नियमित होत असल्याचे कारण देऊन वैद्यकीय तपासणीच्या बहाण्याने त्याला घेऊन भोपाळमधील एमपी नगर येथील एका खाजगी रुग्णालयात गेला. पण पीडित व्यक्तीला माहिती न देता किंवा त्याच्या संमतीशिवाय, आरोपीने त्याला कथित आजारासाठी औषध देण्याच्या बहाण्याने हार्मोन थेरपी देण्यास सुरुवात केली.
“एक महिन्याच्या आत, मला माझ्या शरिरात बदल जाणवण्यास सुरूवात झाली, आणि मी खूपच गोंधळले आणि घाबरलो,” असे पीडित व्यक्तीने पोलिसांना सांगितले.
मात्र त्याच्या नेमकं काय सुरू आहे हे लक्षात येण्याच्या आधीच शुभम त्याला कथितपणे इंदोर येथे घेऊन गेला आणि त्याची लिंगबदल शस्त्रक्रिया करम्यात आली, ज्याच्या माध्यमातून त्याला बळजबरीने पुरुषापासून स्त्री बनवण्यात आले. या पुन्हा बदलता न येणार्‍या प्रक्रियेसाठी त्यांना जवळपास ५ लाख रूपयांचा खर्च आला.
शस्त्रक्रिया झाल्यानंतर आरोपीने पीडित व्यक्तीला नर्मदापुरम येथे बोलवले, येथे त्याने त्याचा लैंगिक छळ केला. पण हे सर्व इथेच थांबवे नाही. आता पीडित व्यक्तीने शुभमने धमकी देऊन त्याच्याकडून १० लाख रुपये मागितल्याचा आरोप केला आहे. जर पैसै दिले नाहीत तर आयुष्य बरबाद करण्याची धमकी दिल्याचाही आरोप पीडित व्यक्तीने केला आहे.
गांधीनगर पोलीस ठाण्याचे प्रभारी विजेंद्र मारस्कोले यांनी एनडीटीव्हीशी बोलताना या प्रकरणाची पुष्टी केली आहे. “पीडित व्यक्तीने दिलेल्या तक्रारीनुसार आम्ही एक झिरो एफआयआर दाखल केला आहे. प्रकरणात शारीरिक शोषण आणि ब्लॅकमेलिंगचे गंभीर आरोप आहेत. ही घटना प्रामुख्याने नर्मदापुरममध्ये घडली असल्याने, पुढील तपासासाठी केस डायरी तेथे पाठवली जाईल,” असे त्यांनी सांगितले.
सध्या तरी या प्रकरणात कोणतीही अटक झालेली नाही. तर पोलिसांनी ते पुढील जबाब नोंदवतील आणि भोपाळ आणि इंदोर येथील संबंधित रुग्णालयांचे मेडिकल रिपोर्ट तपासतील असे सांगितले आहे.
