Manish Sisodia Arrest: “आता पुढचा नंबर केजरीवाल..”, मनिष सिसोदिया यांच्या अटकेनंतर भाजपाची प्रतिक्रिया

आता पुढचा नंबर अरविंद केजरीवाल यांचा

भाजपाचे नेते कपिल मिश्रा यांनी ट्विट करत प्रतिक्रिया दिली. “दारू घोटाळ्यात मनिष सिसोदिया यांना अटक झाली. दारूमुळे उध्वस्त झालेल्या माता-भगिनींची हाय मनिष सिसोदिया यांना लागली आहे. मी आधीपासूनच सांगत होतो की, केजरीवाल, मनिष सिसोदिया आणि सत्येंद्र जैन तुरुंगात जातील. यातील दोन लोक आता तुरुंगात गेले आहेत. आता पुढचा नंबर केजरीवाल यांचा आहे.”, असे ट्विट करत कपिल मिश्रा यांनी थेट अरविंद केजरीवाल यांना इशारा दिला आहे.

आमचा संघर्ष आणखी मजबूत होईल – केजरीवाल

मुख्यमंत्री अरविंद केजरीवाल यांनी देखील या प्रकरणावर प्रतिक्रिया देताना भाजपावर टीका केली. ते म्हणाले, “मनिष निर्दोष आहे. त्यांची अटक हे घाणेरडे राजकारण आहे. लोकांमध्ये याबाबत संताप आहे. लोक हे सर्व बघत असून त्यांना सर्व समजून येत आहे. लोक नक्कीच याला उत्तर देतील. आमचे धैर्य आणि आमचा संघर्ष आणखी मजबूत होईल”

नेमकं प्रकरण काय?

गेल्यावर्षी १७ नोव्हेंबरला दिल्ली सरकारने नवीन उत्पादन शुल्क धोरण लागू केले होते. या धोरणामुळे कोट्यवधी रुपयांची उलाढाल होईल आणि मद्य माफियांवर अंकुश बसेल, असा विश्वास दिल्लीचे मुख्यमंत्री अरविंद केजरीवालांनी व्यक्त केला होता. त्यामुळे या धोरणाअंतर्गत सर्व सरकारी आणि खासगी दारूची दुकानं बंद करून नवीन निविदा जारी करण्यात आल्या होत्या. या अगोदर दिल्लीत ७२० दारूची दुकाने होती. त्यापैकी २६० खासगी दुकाने होती. मात्र, नवीन धोरणानंतर सर्व दुकाने खासगी व्यवसायिकांच्या ताब्यात गेली. यावर दिल्लीच्या उपराज्यपालांनी आक्षेप घेतला होता. हे धोरण राबवताना गैरव्यवहार करण्यात आल्याचा आरोप करण्यात आला.