Minta Devi काँग्रेसने मंगळवारी केलेल्या आंदोलनात मिंटा देवी हे नाव चर्चेत आलं. कारण प्रियांका गांधी आणि राहुल गांधी या दोघांसह अनेक आंदोलकांनी मिंटा देवी यांचा फोटो असलेला टी शर्ट परिधान केला होता. या आंदोलनानंतर मिंटा देवी कोण याची चर्चा सुरु झाली. दरम्यान मिंटा देवी यांनी याबाबत संताप व्यक्त केला आहे. राहुल गांधी आणि प्रियांका गांधी यांनी कुणाला विचारुन माझा फोटो वापरला? असा सवाल मिंटा देवी यांनी केला आहे.
कोण आहेत मिंटा देवी?
निवडणूक आयोगाच्या नोंदींनुसार, मिंटा देवी या बिहारमधील सिवान जिल्ह्यातील दरौंदा विधानसभा मतदारसंघातील नोंदणीकृत मतदार आहेत. त्यांच्या पतीचे नाव धनंजय कुमार सिंह असून, मतदार यादीत मिंटादेवींचे वय १२४ वर्षे दाखवण्यात आले आहे. विशेष बाब म्हणजे, मिंटा देवी यांनी २०२४ मध्ये पहिल्यांदाच मतदान केल्याचं सांगितलं जात आहे. अरजानिपूर येथील कन्या माध्यमिक विद्यालय हे त्यांचे मतदान केंद्र आहे. काँग्रेसने आपल्या अधिकृत एक्स अकाउंटवरून केलेल्या पोस्टमध्ये म्हटलंय की, बिहारमधून एक अदभुत प्रकरण समोर आलं आहे, ज्यात महिला मतदाराचं वय १२४ असून, त्या पहिल्यांदाच मतदान करीत आहेत. ही मतदार यादी खोटी असून, हा नव्या प्रकारचा घोटाळा आहे, जो भाजपा आणि निवडणूक आयोगानं मिळून केला आहे. असं असल्यानेच काँग्रेसने आंदोलनात मिंटा देवी यांचा फोटो वापरला. त्यावर आता त्यांनी आक्षेप घेतला.
काय म्हणाल्या मिंटा देवी?
माझी संमती न घेता आंदोलनासाठी परिधान करण्यात आलेल्या टीशर्टवर फोटो छापणारे ते (विरोधी पक्षातील आंदोलक खासदार) कोण आहेत? राहुल गांधी आणि प्रियांका गांधी यांनी टीशर्टवर माझा फोटो छापण्याआधी माझी परवानगी का घेतली नाही? ANI या वृत्तसंस्थेशी बोलताना मिंटा देवी यांनी संताप व्यक्त केला आहे. मिंटा देवी म्हणाल्या माझी जन्मतारीख १५ जुलै १९९० अशी आहे. तरीही माझं वय १२४ वर्षे कसं काय लिहिलं? हे लोक कशी कामं करतात त्यांनाच माहीत. मी माझं आधार कार्ड आणि आवश्यक सगळी कागदपत्रं सादर केली होती. तरीही मतदार यादी तयार करणाऱ्यांनी जो घोळ घालायचा तो घातलाच. यांनी काय झोपेत माझी जन्मतारीख लिहिली का? असं म्हणत मिंटा देवींनी संताप व्यक्त केला आहे.
काँग्रेसच्या आंदोलनावर मिंटा देवींची टीका
मिंटा देवी म्हणाल्या माझं वय १२४ छापण्यात आलं ही चूक आहेच. पण काँग्रेसने कुणाला विचारुन माझा फोटो छापला? त्यांनी हे करण्याआधी माझी परवानगी का घेतली नाही? असा सवाल मिंटा देवींनी केला आहे. मिंटा देवी यांचं नाव ७ ऑगस्टला राहुल गांधींनी घेतलेल्या पत्रकार परिषदेतही समोर आलं होतं. राहुल गांधी यांनी मतदारांची नावं आणि वय कसं बदललं गेलं तरीही त्यांनी मतदान कसं केलं हे विचारत असताना मिंटा देवींच्या व्होटर कार्डचा फोटो आणि त्यांचं वय हे दोन्ही दाखवलं होतं. हिंदुस्थान टाइम्सने हे वृत्त दिलं आहे.
