राज ठाकरे म्हणतात ‘बघा हा व्हिडीओ’

राज ठाकरे यांनी त्यांच्या फेसबुक खात्यावर ही पोस्ट शेअर केली आहे. त्या पोस्टमध्ये ‘#WorldEnvironmentDay
वर म्हणल्या प्रमाणे ‘हवामान बदल’ ह्या विषयी जगभरात कशी जनआंदोलन उभी राहत आहेत, हे पण बघायला हवं. मी एका चित्रफितीचा दुवा इथे देत आहे’ असे त्यांनी लिहिले.

‘ग्रेटा थनबर्ग ही १६ वर्षांची स्वीडिश मुलगी, हवामान बदलाविषयी प्रचंड कळकळीने ती जगभरातल्या नेत्यांसमोर विचार मांडत आहे. २०३० पर्यंत कार्बन उत्सर्जन कमी झालं नाही तर कधीही भरून न निघणारी हानी ह्या पृथ्वीची होईल असं ती सांगून जेंव्हा ती जगभरातल्या मुलांना आपापल्या देशात आंदोलन उभं करायचं आवाहन करते तेंव्हा अनेक देशात लहान लहान मुलं रस्त्यावर उतरत आहेत. नॉर्वे सरकारने तर हिच्या नावाची शिफारस नोबेल पारितोषिकासाठी केली आहे तर टाइम मासिकाच्या मुखपृष्ठावर हिचा उल्लेख जगाचं भविष्य घडवणारी पुढच्या पिढीचे नेता असा केला आहे. वल्ड इकॉनॉमिक फोरम पासून अनेक ठिकाणी ग्रेटाने आपली भूमिका मांडली आहे. ही चित्रफीत देखील जरूर पहा’ असे पुढे त्यांनी लिहिले होते.

या पोस्टसह राज ठाकरे यांनी यूट्यूबचा एक व्हिडीओ देखील शेअर केला. या व्हिडीओमध्ये ग्रेटा थेनबर्ग या १६ वर्षांच्या स्वीडिश मुलीने हवामानात होणाऱ्या बदलांविषयी माहिती सांगितली आहे. सध्या हा व्हिडीओ सोशल मीडियावर व्हायरल झाला आहे. ग्रेटा थंनबर्गला शांततेच्या नोबेल पुरस्कारासाठी नामांकन मिळाले आहे. जर तिला हा पुरस्कार मिळाला तर ती सर्वात कमी वयाची नोबेल विजेती ठरेल

हवामान बदलासमोर आपण अपयशी ठरलो आहोत, हे मान्य करावे लागेल, असे म्हणत दावोस इथल्या ‘वर्ल्ड इकॉनॉमिक फोरम’मध्येही तिने हवामान बदलावर आपली भूमिका मांडली होती. ‘अस्पर्जर सिंड्रोम’ या आजाराने ग्रस्त असलेल्या ग्रेटाने गेल्या वर्षी ऑगस्ट महिन्यात स्वीडनच्या संसदेसमोर पर्यावरणाची हानी रोखण्यासाठी एक आंदोलन केले होते. हे आंदोलन ‘फ्रायडे फॉर द फ्युचर’ या नावाने चर्चेत आले. ग्रेटाचे ‘फ्रायडे फॉर द फ्युचर’ हे आंदोलन जवळपास १०० देशांत पोहोचले. तिच्या आंदोलनानंतर लगेचच जर्मनी, बेल्जियम, ब्रिटन, फ्रान्स, ऑस्ट्रेलिया आणि जपान या देशांमध्येही पर्यावरण वाचवण्यासाठी आंदोलने केली गेली.