Nayanthara : नयनाताराच्या माहितीपटासंदर्भात उच्च न्यायालयाची निर्मात्यांसह नेटफ्लिक्सला नोटीस, उत्तर देण्यासाठी दोन आठवड्यांची मुदत

काय म्हणाले न्यायाधीश सेंथीलकुमार राममूर्ती?

न्यायाधीश सेंथीलकुमार राममूर्ती यांनी या प्रकरणात Tarc Studio LLP आणि नेटफ्लिक्सला नोटीस बजावली आहे. या प्रकरणात दोन आठवड्यांमध्ये उत्तर द्या असंही मद्रास उच्च न्यायालयाने म्हटलं आहे. या प्रकरणात एपी इंटरनॅशनलचे चित्रपट वितरण कंपनीने नयनताराच्या माहितीपटाविरोधात मद्रास उच्च न्यायालयात याचिका दाखल केली होती. या माहितीपटात वापरण्यात आलेलं गाणं, काही प्रसंग या सगळ्याचे हक्क राखीव आहेत. आमच्याकडून माहितीपटात ते वापरण्यासाठी संमती घेतलेली नाही. तरीही Tarc LLP ने आमच्या चित्रपटातले काही प्रसंग आणि गाणी नयनतारावरच्या माहितीपटात वापरली आहेत हा आरोप करत याचिका दाखल करण्यात आली होती.

नयनताराबाबतच्या माहितीपटाचा वाद पुन्हा एकदा न्यायालयात

याच याचिकेवर सुनावणी घेत असताना सेंथीलकुमार राममूर्ती यांनी टार्क एलएलपी आणि नेटफ्लिक्सला नोटीस बजावली आहे. एवढंच नाही जी याचिका यांच्या विरोधात दाखल करण्यात आली आहे त्यात जे काही नुकसान झालं आहे त्याची भरपाई म्हणून पाच कोटी रुपये दिले जावेत अशीही मागणी करण्यात आली. दरम्यान न्यायालयाने या प्रकरणी नेटफ्लिक्स आणि टार्क एलएलपीला नोटीस बजावली आहे. तसंच दोन आठवड्यांत या नोटिशीला उत्तर देण्याच्याही सूचना केल्या आहेत. Live Law ने याबाबतचं वृत्त दिलं आहे.

२०२४ मध्ये प्रदर्शित झाला आहे माहितीपट

नयनतारा फेअरी टेल नावाचा माहितीपट नोव्हेंबर २०२४ या महिन्यात नेटफ्लिक्सवर प्रदर्शित झाला आहे. या चित्रपटात विग्नेश सिवन आणि नयनतारा यांचं लग्न, त्याची तयारी, सरोगसीद्वारे नयनताराचं आई होणं या सगळ्या गोष्टी दाखवण्यात आल्या आहेत. मात्र या माहितीपटातली गाणी, काही प्रसंग हे रजनीकांत यांच्या चंद्रमुखी चित्रपटातून घेण्यात आले आहेत ज्यासाठी कुठलीही संमती घेण्यात आलेली नाही. याआधी धनुष या अभिनेत्यानेही नयनताराच्या या माहितीपटाविरोधात न्यायालयात धाव घेतली होती. आता पुन्हा एकदा हा प्रश्न निर्माण झाला आहे. कारण चित्रपट वितरकांनी या माहितीपटाच्या विरोधात न्यायालयात धाव घेतली आहे.