Robert Vadra : प्रियांका गांधींचे पती आणि व्यावसायिक रॉबर्ट वाड्रांच्या अडचणी वाढल्याचं दिसून येतं आहे. कारण ईडीच्या चार्जशीटमध्ये रॉबर्ट वाड्रांवर गंभीर आरोप करण्यात आला आहे. रॉबर्ट वाड्रांनी ५८ कोटींची बेकायदेशीर कमाई केली असा ठपका ईडीच्या आरोपपत्रात ठेवण्यात आला आहे. बेकायदेशीर मार्गाने केलेली कमाई ही आर्थिक अफरातफर मानली जाते. त्यामुळे अशा प्रकारे संपत्ती जमा करणं हा कायद्याने गुन्हा आहे. त्यामुळेच रॉबर्ट वाड्रांच्या अडचणी वाढल्या आहेत.
ईडीच्या आरोपपत्रात काय उल्लेख?
व्यावसायिक आणि प्रियांका गांधींचे पती रॉबर्ट वाड्रा यांनी ५८ कोटी रुपये बेकायदेशीर मार्गाने कमवले असा ठपका त्यांच्यावर ठेवण्यात आला आहे. ५८ कोटींपैकी पाच कोटी रुपये ब्लू ब्रीज ट्रेडिंग प्रायव्हेट लिमिटेडच्या मार्गाने आणि ५३ कोटी रुपये स्काय लाइट हॉस्पिटालिटी प्रायव्हेट लिमिटेडच्या माध्यमातून वाड्रांच्या व्यवसाय क्षेत्रात पोहचले. या दोन्ही कंपन्यांच्या माध्यमातून ही रक्कम कायदेशीर करण्याचा प्रयत्न झाला. मात्र या कंपन्यांच्या नावे आधीच काही गुन्हे आहेत. त्यामुळे हे प्रकरण समोर आलं. आता रॉबर्ट वाड्रांच्या अडचणींमध्ये भर पडली आहे.
ईडीने आणखी काय म्हटलं आहे?
ईडीने म्हटलं आहे की रॉबर्ट वाड्रा यांनी स्कायलाईट हॉस्पिटॅलिटी आणि BBTPL या कंपन्यांच्या मार्फत आर्थिक अफरातफर करुन ५८ कोटींची बेकायदेशीर कमाई केली. ही रक्कम त्यांनी त्यांच्या आलीशान रहाणीमानासाठी खर्च केली. आता या प्रकरणात ईडीकडून सखोल तपास सुरु आहे. आर्थिक अफरातफर नेमकी कशी करण्यात आली याचा तपास ईडीकडून केला जातो आहे. या दोन कंपन्यांच्या मार्फत रॉबर्ट वाड्रा यांनी स्थावर आणि जंगम अशा दोन्ही मालमत्ता खरेदी केल्याचाही आरोप ईडीने आरोपपत्रात केला आहे.
