राजीव यांच्या मारेकऱ्यांना फाशीऐवजी जन्मठेपच

गेल्या दहा वर्षांपासून केंद्रात काँग्रेसप्रणीत संयुक्त पुरोगामी आघाडी सरकार सत्तेत असूनही राजीव गांधी यांच्या मारेकऱ्यांना फाशीची शिक्षा ठोठावण्यात केंद्र सरकार अपयशी ठरले आहे. राजीव यांच्या मारेकऱ्यांच्या दया अर्जाबाबत ठोस निर्णय घेण्यात अक्षम्य दिरंगाई केल्याचे कारण पुढे करत मंगळवारी सर्वोच्च न्यायालयाने तिघांचीही फाशीची शिक्षा जन्मठेपेत परावर्तित केली.
राजीव यांच्या मारेकऱ्यांना ११ मे १९९९ रोजी फाशीची शिक्षा झाली. मात्र, त्यानंतर मारेकऱ्यांनी राष्ट्रपतींकडे दयाअर्ज सादर केला. मात्र, संथान, मुरुगन व पेरारीवेलन या तिघांचाही दया अर्ज राष्ट्रपतींकडे पडून होता. आपल्या जगण्याच्या हक्कावर गदा येत असल्याचे सांगत या तिघांनीही आपली फाशीची शिक्षा जन्मठेपेत परावर्तित केली जावी अशी मागणी करणारी याचिका सर्वोच्च न्यायालयाकडे दाखल केली होती.