Krishna Janmabhoomi Case: मथुरा कोर्टाचा मोठा निर्णय; शाही इदगाह मशिदीच्या सर्वेक्षणाचे दिले आदेश!

काय आहे हा वाद?

मथुरेमध्ये ज्या ठिकाणी शाही इदगाह मशीद आहे, तिथेच कृष्ण जन्मभूमी असल्याचा दावा काही हिंदू संघटनांनी केला आहे. त्यामुळे या जागेवरील मशीद हटवण्यात यावी आणि तिथे कृष्णभक्तांना प्रार्थना करण्याची परवानगी मिळावी, अशी मागणी पहिल्या याचिकेमध्ये करण्यात आली होती. मुघल सम्राट औरंगजेबाच्या आदेशावरून १९६९-७० च्या सुमारास कटरा केशव देव मंदिराच्या एकूण १३.३७ एकर जमिनीवर ही मशीद बांधण्यात आली होती, असा दावाही याचिकेत करण्यात आला आहे.

मात्र, न्यायालयाने ही याचिका फेटाळून लावली होती. प्रार्थनास्थळ कायदा १९९१नुसार १५ ऑगस्ट १९४७मध्ये धर्मस्थळांची असलेली स्थिती आणि दर्जा कायम ठेवण्यात आला आहे. या कायद्याचा हवाला न्यायालयाने यावेळी याचिका फेटाळताना दिला होता. तसेच, जर याचिका दाखल करण्यात आली, तर अशाप्रकारे असंख्य भक्तगण न्यायालयात याचिका घेऊन येतील, असंही मत न्यायालयाने यावेळी नोंदवलं होतं.

विश्लेषण : कृष्ण जन्मभूमीचा वाद आणि १९६८ सालची तडजोड; वाचा नेमका काय आहे वाद!

दरम्यान, यासंदर्भात हिंदू सेनाचे सदस्य विष्णू गुप्ता यांनी पुनर्विचार याचिका दाखल केल्यानंतर न्यायालयाने या जागेचं सर्वेक्षण करण्याचे आदेश दिले आहेत. यासंदर्भात पुरातत्व विभागाला २ जानेवारीपासून हे सर्वेक्षण करण्यास न्यायालयाने सांगितले आहे. या सर्वेक्षणाचा अहवाल २० जानेवारीनंतर न्यायालयाकडे सादर केला जाण्याची शक्यता आहे.