shraddha murder case delhi court permits narco test on aaftab poonawala zws 70 | Loksatta

श्रद्धा वालकर हत्या प्रकरण : आफताबच्या ‘नार्को’ चाचणीस न्यायालयाची परवानगी; हल्ला झाल्याने बंदोबस्तात वाढ

या प्रयोगशाळेच्या तज्ज्ञांच्या पथकाद्वारे रोहिणी येथील बाबासाहेब आंबेडकर रुग्णालयात नार्को विश्लेषण केले जाईल.

श्रद्धा वालकर हत्या प्रकरण : आफताबच्या ‘नार्को’ चाचणीस न्यायालयाची परवानगी; हल्ला झाल्याने बंदोबस्तात वाढ
photo source : loksatta file photo

नवी दिल्ली : श्रद्धा वालकर हत्याप्रकरणी आरोपी आफताब अमीन पूनावालाच्या नार्को चाचणीस येथील न्यायालयाने मंगळवारी दिल्ली पोलिसांना परवानगी दिली. आफताबचे वकील अविनाशकुमार यांनी ही माहिती दिली. त्यांनी सांगितले, की १ आणि ५ डिसेंबर रोजी रोहिणी परिसरातील न्यायवैद्यक प्रयोगशाळेकडून आफताबवर ही चाचणी करण्यासाठी पोलिसांनी परवानगी मागितली होती.

या प्रयोगशाळेच्या तज्ज्ञांच्या पथकाद्वारे रोहिणी येथील बाबासाहेब आंबेडकर रुग्णालयात नार्को विश्लेषण केले जाईल. रोहिणी येथे या प्रयोगशाळेत सोमवारी पूनावाला पोलिसांच्या वाहनात असताना काही शस्त्रधारी व्यक्तींनी त्यांच्यावर हल्ला केला होता. समाजमाध्यमांवर पसरलेल्या हल्ल्याच्या चित्रफितीत एक पोलीस हल्लेखोरांना माघारी जाण्याचा इशारा देताना पिस्तूल दाखवताना दिसत आहे. आफताबवर या प्रयोगशाळेत मंगळवारी ‘पॉलीग्राफ’ चाचणीचे सत्र सुरू असताना बाहेरील सुरक्षाव्यवस्था अधिक कडक करण्यात आली होती.

नार्को विश्लेषण, ज्याला ‘ट्रुथ सीरम’ असेही म्हटले जाते, त्यात एखाद्या औषधाची (सोडियम पेंटोथल, स्कोपोलामाइन आणि सोडियम अमायटल) ठरावीक मात्रा शिरेवाटे दिली जाते. त्यामुळे संबंधित व्यक्ती गुंगीच्या विविध स्तरांवर जातो. या अवस्थेत, व्यक्ती शुद्धीत असताना जी माहिती देण्याची शक्यता कमी असते, ती माहिती त्या व्यक्तीकडून दिली जाते. त्यातून गुन्ह्यासंबंधीची काही महत्त्वाची माहिती व धागेदोरे उकलल्याने तपासास मदत होते. एखाद्या प्रकरणात पुरेसे पुरावे न मिळाल्याने गुन्ह्याची नेमकी उकल होत नसल्यास व चित्र स्पष्ट होत नसल्यास तपास यंत्रणा ही चाचणी करतात.

मराठीतील सर्व देश-विदेश ( Desh-videsh ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

First published on: 30-11-2022 at 03:34 IST
Next Story
पंजाबमध्ये पाकिस्तानचे ड्रोन पाडले; ‘बीएसएफ’च्या महिला पथकाची कामगिरी