New Year च्या फोटोशूटसाठी फोटोग्राफर तरुणीला पालकांचा नकार, मुलीनं उचललं टोकाचं पाऊल!

वर्शिनी आर ही एका खासगी महाविद्यालयात बीबीएच्या शेवटच्या वर्षात शिक्षण घेत होती. तिला फोटोग्राफीची प्रचंड आवड होती. याकरता तिने फोटोग्राफीचं शास्त्रशुद्ध शिक्षणही घेतलं होतं. शिक्षणानंतर तिच्यातील आवड बळावत गेली. त्यामुळे ती मिळेल तिथे फोटो काढत असे. या उद्देशाने नवीन वर्षाच्या स्वागतासाठी ती बाहेर जाऊन फोटोग्राफी करणार होती. परंतु, बाहेर गर्दी असेल या कारणाने तिच्या पालकांनी तिला बाहेर जाण्यास नकार दिला. पालकांनी नकार दिल्याने रागावलेल्या वर्शिनी या २१ वर्षीय तरुणीने स्वतःचं आयुष्य संपवलं. वर्शिनीचे वडील राजन्ना यांनी याप्रकरणी विल्सन गार्डन पोलीस ठाण्यात तक्रार दाखल केली आहे.

पोलीस तक्रारीत राजन्ना म्हणाले, वर्शिनी माझी तिसरी मुलगी होती. एका खासगी संस्थेतून तिने फोटोग्राफीचं शिक्षण घेतलं होतं. आमच्या मोबाईलमध्ये तिने शेकडो फोटो क्लिक केले होते. तिची फोटोग्राफीची आवड लक्षात घेऊनच आम्ही तिला फोटोग्राफीचं शिक्षण दिलं होतं. रविवारी वार्शिनी हिने नवीन वर्षाच्या स्वागतासाठी बाहेर जाऊन फोटो काढण्याची इच्छा व्यक्त केली. परंतु, बाहेर भरपूर गर्दी असेल. तसंच अशा गर्दीच्या ठिकाणी जाणं धोक्याचं ठरेल या कारणाने आम्ही तिला बाहेर जाण्यास नकार दिला. यामुळे ती आमच्यावर रागावली आणि तिच्या खोलीत निघून गेली. मध्यरात्री मला जाग आली. तिने काही खाल्लं नसेल म्हणून मी तिला खाण्यासाठी उठवायला गेलो. परंतु, तिने खोलीतून काहीच प्रत्युत्तर दिलं नाही. मी घाबरल्याने लागलीच खोलीचा दरवाजा तोडला. तेव्हा मी पाहिलं की तिने गळफास घेतला होता. मी तिला तत्काळ KIMS रुग्णालयात दाखल केलं. परंतु, डॉक्टरांनी तिला मृत घोषित केलं.