सुप्रीम कोर्टाचा मल्ल्यांना संपत्ती जाहीर करण्याचा आदेश; बँकांनी मल्ल्यांचा प्रस्ताव धुडकावला

मल्ल्या यांनी १७ बँकांकडून घेतलेल्या कर्जाची रक्कम ९००० कोटी इतकी आहे.

Vijay Mallya , Kingfisher, SBI, banks, loan, ED, Kingfisher Airlines chairman Vijay Mallya,
Kingfisher Airlines Chairman Vijay Mallya : मल्ल्या यांनी त्यापैकी ४००० कोटींचे कर्ज येत्या सप्टेंबरपर्यंत फेडण्याचे आश्वासन दिले होते.

सर्वोच्च न्यायालयाने गुरूवारी किंगफिशर एअरलाईन्सचे मालक विजय मल्ल्यांना त्यांची संपत्ती जाहीर करण्याचे आदेश दिले. मल्ल्या यांनी स्वत:च्या आणि कुटुंबियांच्या संपत्तीचा खरा तपशील जाहीर करावा, असे न्यायालयाने सांगितले. याशिवाय , न्यायालयाने मल्ल्यांचा वकिलांना मल्ल्या भारतात कधी परतणार, याबद्दलची माहिती देण्याचेही आदेश दिले आहेत. दरम्यान, आजच्या सुनावणीत स्टेट बँक ऑफ इंडियाच्या (एसबीआय) नेतृत्वाखालील १७ बँकांच्या समुहाने विजय मल्ल्या यांचा कर्जफेडीचा प्रस्ताव नाकारला. मल्ल्या यांनी सार्वजनिक क्षेत्रातील बँकाकडून घेतलेल्या कर्जापैकी चार हजार कोटी रूपयांच्या परतफेडीचा प्रस्ताव गेल्या बुधवारी सर्वोच्च न्यायालयापुढे सादर केला होता. मात्र, बँक समुहाच्या माहितीनुसार मल्ल्या यांनी १७ बँकांकडून घेतलेल्या एकत्रित कर्जाची रक्कम ९००० कोटी इतकी आहे. मल्ल्या यांनी त्यापैकी ४००० कोटींचे कर्ज येत्या सप्टेंबरपर्यंत फेडण्याचे आश्वासन दिले होते. मात्र, त्यासाठी मल्ल्या यांनी समोरासमोर बसून चर्चा करावी, असा आग्रह धरत बँकांनी मल्ल्याचा प्रस्ताव नाकारला. याशिवाय, मल्ल्या यांना त्यांच्या शेअर बाजारातील गुंतवणुकीसह स्थावर आणि जंगम मालमत्ता जाहीर करण्याचे निर्देश द्यावेत, अशी मागणीही बँकांनी केली. सर्वोच्च न्यायालयाच्या कुरियन जोसेफ आणि एफ. नरिमन यांच्या खंडपीठाने बँकांची मागणी मान्य करत मल्ल्यांना संपत्ती जाहीर करण्याचे आदेश दिले. याप्रकरणाची पुढील सुनावणी २६ एप्रिल रोजी होणार आहे.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व देश-विदेश बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Supreme court orders vijay mallya to declare all assets banks reject his proposal