तेलंगणच्या नलंगोडा जिल्ह्यात एका खासगी वैमानिक प्रशिक्षण संस्थेच्या विमानाला शनिवारी झालेल्या अपघातात एक प्रशिक्षणार्थी महिला वैमानिक ठार झाली. गेल्या चार महिन्यांपासून प्रशिक्षण घेत असलेल्या महिमा या २८ वर्षांच्या तरुणीने सकाळी १०.२५ वाजताच्या सुमारास सेसना १५२ या प्रशिक्षणार्थी विमानातून उड्डाण केले आणि ते जिल्ह्यातील तुंगातुर्थी खेडय़ावरून उडत होते. यावेळी हे विमान एका शेतात कोसळत असल्याचे आणि त्याचे तुकडे होत असल्याचे एका प्रत्यक्षदर्शीने पाहिले. अपघातानंतर विमानाला आग लागली नाही, असे एका पोलीस अधिकाऱ्याने सांगितले. हा प्रत्यक्षदर्शी साक्षीदार विमानाजवळ पोहचेपर्यंत वैमानिक मरण पावली होती. विमानात ती एकटीच होती. वैमानिक प्रशिक्षण संस्था आंध्र प्रदेशातील माचर्ला येथे असून ती तेलंगणपासून अगदीच जवळ आहे. या विमानाने प्रशिक्षणासाठीच असलेल्या एका हवाई पट्टीवरून उड्डाण केले होते. तमिळनाडूची मूळ रहिवासी असलेली ही तरुणी सिकंदराबादमध्ये राहात होती. ती नेहमीचे उड्डाण करत होती आणि तळावर परत येणार होती. तमिळनाडूची मूळ रहिवासी असलेली ही तरुणी सिकंदराबादमध्ये राहात होती. विमान वाहतूकमंत्री ज्योतिरादित्य शिंदे यांनी विमान अपघातामुळे आपल्याला धक्का बसला असल्याचे ट्विटरवर लिहिले. तपास पथक अपघांतस्थळी पाठवण्यात आले आहे. मात्र दुर्दैवाने आपण विद्यार्थी वैमानिक गमावला आहे, असे ते म्हणाले.
