एका बाजूला युद्ध थांबवायचं आवाहन, दुसरीकडे अमेरिकेची शस्त्रास्र विकून नफेखोरी; व्हाईट हाऊसमधील अधिकाऱ्यांनं काय सांगितलं?

अमेरिका एका बाजूला भारतावर आरोप करतेय आणि दुसऱ्या बाजूला स्वतः मात्र युरोपातील देशांना शस्त्रास्रे विकून मोठ्या प्रमाणात नफा कमावतेय. अमेरिकेने ही बाब मान्य केली आहे की ते युरोपातील देशांना मोठ्या प्रमाणात शस्त्रास्रे विकत आहेत आणि युरोपातील देश हीच शस्त्रास्रे १० टक्के अधिक किमतीत युक्रेनला विकत आहेत. याचाच अर्थ या शस्त्रास्रांच्या व्यवहारातून अमेरिका आणि युरोप दोघेही मोठ्या प्रमाणात पैसे कमावत आहेत. परंतु, टीका केवळ भारतावर केली जातेय.

व्हाइट हाऊसमधील अधिकाऱ्याची कबुली

यूएस ट्रेजरी सेक्रेटरी स्कॉट बेसेंट यांनी कबूल केलं आहे की अमेरिका युरोपला शस्त्रे पुरवते. यापैकी काही शस्त्रास्रे युरोप युक्रेनला १० टक्के अधिक किमतीत विकत आहे. याबद्दल बेसेंट म्हणाले, “मला वाटतं की अमेरिकेचे अध्यक्ष खूप दक्ष आहेत. आपण युरोपातील देशांना शस्त्रे विकतो. युरोपातील देश हीच शस्त्रे पुढे युक्रेनला विकतात. ट्रम्प आणि युरोपीय देश यातून १० टक्के नफा कमावतात. हेच १० टक्के पैसे आपल्या हवाई सुरक्षेचा खर्च भागवण्यासाठी वापरले जातात.”

बेसेंट यांचा भारतातील उद्योगपतींवर आरोप

बेसेंट यांनी सीएनबीसीला दिलेल्या मुलाखतीत बोलत असताना भारतावर टीका केली. भारत रशियाकडून स्वस्त तेल खरेदी करून त्याचे पेट्रोलियम उत्पादनांत शुद्धीकरण करून निर्यात करत असल्याचा आरोपही त्यांनी यावेळी केला. तसेच भारत यातून केवळ लाभ मिळवत असल्याची टिप्पणी केली. भारतातील काही उद्योगपती स्वस्त रशियन तेल खरेदी करून त्याचं शुद्धीकरण करून त्याच्या विक्रीद्वारे भारत १६ अब्ज डॉलर्सचा नफा कमवत आहेत, असं बेसेंट म्हणाले.

चीनला सूट देण्याचं कारण काय?

अमेरिकेने सेकेंडरी टॅरिफ लावण्याचा विचार केला आहे. ज्यामुळे रशियन तेल आयात करणाऱ्या भारतावर अतिरिक्त कर लावले जाऊ शकतात. मात्र, रशियाकडून मोठ्या प्रमाणात ऊर्जा व तेलाची खरेदी करणाऱ्चा चीनला यापासून सूट दिली आहे. यावर बेसेंट म्हणाले की “ट्रम्प प्रशासन चीनकडे वेगळ्या दृष्टीकोनातून पाहतंय. रशिया व युक्रेनचा संघर्ष सुरू होण्याच्या आधीपासूनच चीन रशियाकडून ऊर्जा व इतर वस्तूंची आयात करतोय.”