पाकिस्तानबरोबर हेरगिरी केल्याच्या आरोपाखाली ज्योती मल्होत्रावर भारतात कारवाई करण्यात आली. मात्र, भारतातील ही इन्फ्युअन्सर पाकिस्तानपर्यंत कशी पोहोचली ही बाब धक्कादायक आहे. भारतीय इन्फ्लुअन्सर्सना पाकिस्तानात प्रवेश करण्याकरता मदत करणारी एक महिला केंद्रस्थानी आहे. ती ‘जय्याना ट्रॅव्हल अँड टुरिझम’ ट्रॅव्हल एजन्सी चालवत असून पाकिस्तानातील प्रसिद्ध व्यावसायिक आहे. नोशाबा शहजाद असं तिचं नाव आहे. ती पाकिस्तानची गुप्तचर संस्था, इंटर-सर्व्हिसेस इंटेलिजेंस (ISI) च्या अंतर्गत काम करत असल्याचंही वृत्त आहे. ISI मध्ये ‘मॅडम एन’ या सांकेतिक नावाने ओळखल्या जाणाऱ्या शहजादने ज्योती मल्होत्रासारख्या भारतीय इन्फ्लुअन्सर्स व्यक्तींना प्रवास करण्यासाठी मदत केली.
मॅडम एनला नेटवर्क बनवण्याचे निर्देश
ज्योती मल्होत्राची चौकशी सुरू असताना भारतात गुप्तपणे किमान ५०० हेर कार्यरत असल्याची माहिती गुप्तचर यंत्रणांना मिळाली. त्यांना स्लीपर सेल नेटवर्कच्या नियोजनात शहजादची महत्त्वाची भूमिका आहे. भारतीय इन्फ्लुअन्सर्सचं ऑपरेशन पाकिस्तानी लष्कर आणि आयएसआयने आखलं होतं, असं म्हटलं जातंय. यामध्ये शहजादला हे गुप्त नेटवर्क स्थापित करण्याचे निर्देश देण्यात आले होते. महत्त्वाचं म्हणजे, शहजादचा पती निवृत्त पाकिस्तानी नागरी सेवा अधिकारी आहे, यामुळे तिचे राज्य यंत्रणेशी चांगले संबंध आहेत.
एका फोनवर मिळायचा पाकिस्तानी व्हिसा
शहजादने भारतीय सोशल मीडियावरील व्यक्तींना पाकिस्तानी लष्करी आणि गुप्तचर संस्थांशी ओळख करून दिली आणि भारतीय हिंदू आणि शीख समुदायांना लक्ष्य केले. गेल्या सहा महिन्यांत, तिने जवळजवळ ३,००० भारतीय नागरिक आणि १,५०० अनिवासी भारतीयांना (एनआरआय) भेटी दिल्याचे सांगितले जाते. तिचा प्रभाव दिल्लीतील पाकिस्तानी दूतावासाच्या व्हिसा विभागातही होता. तिने प्रथम सचिव (व्हिसा) सुहेल कमर आणि समुपदेशक (व्यापार) उमर शेरियार यांसारख्या प्रमुख अधिकाऱ्यांशी जवळचे संपर्क ठेवले होते. सूत्रांचे म्हणणे आहे की शहजाद पाकिस्तानी व्हिसा जलद मिळवू शकत होती. तिच्या एका फोनने हा व्हिसा मिळत होता. तिने दानिश उर्फ एहसान-उर-रहमानशी देखील संपर्क ठेवला होता. तो आयएसआयचा एक गुप्तहेर आणि व्हिसा अधिकारी आहे. मे महिन्यात ज्योती मल्होत्राच्या कारवाया उघडकीस आल्यानंतर त्याला भारतातून हद्दपार करण्यात आलं आहे.
भारत आणि पाकिस्तानमध्ये औपचारिक पर्यटन व्हिसाच्या तरतुदी नसतानाही, शहजादची ट्रॅव्हल एजन्सी इव्हॅक्यू ट्रस्ट प्रॉपर्टी बोर्डच्या सहकार्याने पाकिस्तानातील शीख आणि हिंदू तीर्थयात्रेची एकमेव सुविधा देणारी होती. तिने भारतीय यात्रेकरूंकडून अवाजवी शुल्क आकारल्याचा आरोप आहे. याचा वापर पाकिस्तानी प्रचार प्रयत्नांना पुढे नेण्यासाठी केला जात असे. सूत्रांनी दिलेल्या माहितीनुसार, अलिकडेच, शहजादने दिल्ली आणि इतर भारतीय शहरांमध्ये ट्रॅव्हल एजंट नियुक्त करून तिचे नेटवर्क वाढवले होते. त्यांच्याकडून सोशल मीडिया प्लॅटफॉर्मवरून तिच्या एजन्सीचा प्रचार केला जात होता.
