महाविकास आघाडीतील घटकपक्ष असलेल्या ठाकरे गटाने आज लोकसभेसाठी पहिली यादी जाहीर केली आहे. या पहिल्या यादीत १७ उमेदवारी जाहीर केले आहेत. या यादीमध्ये ज्या जागांवर काँग्रेस पक्षही आग्रही होता, तिथेही ठाकरे गटाने उमेदवारी जाहीर केली आहे. त्यामुळे महाविकास आघाडीत आता रस्सीखेच पाहायला मिळत आहे. दरम्यान, काँग्रेसने दावा केलेल्या सांगली लोकसभा मतदारसंघात ठाकरे गटाने उमेदवार दिला असल्याने महाविकास आघाडीत अंतर्गत नाराजी निर्माण झाल्याची चर्चा आहे. यावरून उमेदवार चंद्रहार पाटील यांनी प्रतिक्रिया दिली आहे. ते टीव्ही ९ मराठीशी बोलत होते. सांगली लोकसभा मतदारसंघात सध्या भाजपाचे संजय पाटील खासदार आहेत. तर, काँग्रेसने या जागेवरून आता दावा केला होता. त्यामुळे महाविकास आघाडीत वाद निर्माण झाला होता. चंद्रहार पाटील यांनी नुकतेच ठाकरे गटात प्रवेश केला होता. प्रवेश केल्यानंतर दोनच दिवसांत उद्धव ठाकरेंनी सांगलीत जाऊन त्यांची उमेदवारी जाहीर केली होती. तर, आज (२७ मार्च) संजय राऊतांनी अधिकृतरित्या त्यांची उमेदवारी जाहीर केली. त्यामुळे महाविकास आघाडीत काँग्रेस आता शिवसेनेला मदत करणार का? असा प्रश्न उपस्थित होत आहे. हेही वाचा >> लोकसभेसाठी शिवसेना ठाकरे गटाची पहिली यादी जाहीर, राजन विचारे, चंद्रहार पाटील यांना संधी "उमेदवारी जाहीर झाल्यानंतर चंद्रहार पाटील म्हणाले, महाविकास आघाडीतून आम्ही एकत्र काम करू. माझी उमेदवारी घोषित होण्याआधीच सांगितलं होतं की आम्ही एकसंथपणे पाठीमागे राहून महाविकास आघाडीचा उमेदवार विजयी करू", असं चंद्रहार पाटील म्हणाले. "ही जागा राजू शेट्टींची स्वाभिमानी शेतकरी संघटनेची ही जागा होती. परंतु, ही जागा शिवसेना उद्धव बाळासाहेब ठाकरे यांना मिळाली. त्यामुळे आम्ही महाविकास आघाडीत एकत्र काम करू आणि विजय खेचून आणू", असा विश्वास त्यांनी व्यक्त केला. पाटलांना आपल्याला दिल्लीत पाठवायचं आहे - ठाकरे भाजपच्या संजय पाटील यांनी मागील लोकसभा निवडणुकीत एक लाख ६४ हजार मतधिक्याने बाजी मारली होती. त्यांचा सामना करण्यासाठी महाविकास आघाडीने तयारी सुरू केली आहे. दोन वेळा महाराष्ट्र केसरी राहिलेले कुस्तीगीर चंद्रहार पाटील यांनी ११ मार्च रोजी मातोश्रीवर ठाकरे गटात प्रवेश केला. ‘त्यांची उमेदवारी लोकांनी जाहीर केली आहे. त्यामुळे पाटील यांना आपल्याला दिल्लीत पाठवायचे आहे,’ असे सांगून ठाकरे यांनी पाटील उमेदवारी जाहीर केली. शिवसेना ठाकरे गटाकडून १७ नावं जाहीर १) नरेंद्र खेडकर-बुलढाणा२) संजय देशमुख-यवतमाळ-वाशिम३) संजोग वाघेरे पाटील-मावळ४) चंद्रहार पाटील-सांगली५) नागेश आष्टिकर-हिंगोली६) चंद्रकांत खैरे-छत्रपती संभाजी नगर७) ओमराजे निंबाळकर-धाराशिव८) भाऊसाहेब वाघचौरे-शिर्डी९) राजाभाऊ वाजे-नाशिक१०) अनंत गीते-रायगड११) विनायक राऊत-सिंधुदुर्ग, रत्नागिरी १२) राजन विचारे-ठाणे१३) अनिल देसाई- मुंबई दक्षिण मध्य१४) संजय दिना पाटील-मुंबई ईशान्य१५) अरविंद सावंत-मुंबई दक्षिण१६) अमोल किर्तीकर-मुंबई वायव्य१७) संजय जाधव-परभणी