इचलकरंजी महानगर भाजपचे तीन अध्यक्ष; बाळासाहेब माने, श्रीरंग खवरे, शशिकांत मोहिते यांची निवड

इचलकरंजी विधानसभा मतदारसंघातील तीन मंडलच्या या तीन अध्यक्षपदाची नावे निश्चित करण्यात आली होती. परंतु, माजी मंत्री प्रकाश आवाडे व प्रदेश उपाध्यक्ष सुरेश हाळवणकर या माजी आमदारांच्या संघर्षातून या निवडी रखडल्या होत्या.

सरशी आणि संघर्ष

पूर्व अध्यक्षपदाचे नाव कोणते निश्चित करायचे हा कळीचा मुद्दा बनला होता. या ठिकाणी हाळवणकर यांनी माजी नगरसेवक किसन शिंदे यांच्या नावाचा आग्रह धरला होता. तर आवाडे यांनी खवरे यांची निवड झाली पाहिजे हा मुद्दा ताणून धरला होता. त्यामध्ये आता आवाडे यांची सरशी झाल्याचे दिसत आहे. यामुळे नाराज झालेले हाळवणकर हे आता कोणता पवित्रा घेणार याकडे लक्ष वेधले आहे.