कोल्हापूर : करवीर निवासिनी श्री महालक्ष्मी देवीच्या मूर्तीची संवर्धन प्रक्रिया उद्या सोमवार व मंगळवारी होणार आहे. या कालावधीत भाविकांना मूळ मूर्तीचे दर्शन होणार नाही. भाविकांना पर्यायी दर्शनाची सोय पश्चिम महाराष्ट्र देवस्थान व्यवस्थापन समितीच्या वतीने करण्यात आली आहे.
श्री करवीर निवासिनी श्री अंबाबाई देवीची मूर्ती सुस्थितीत राहण्यासाठी जिल्हाधिकारी तथा देवस्थान व्यवस्थापन समिती प्रशासक यांच्या वतीने मूर्तीची पाहणी करण्यासाठी भारतीय पुरातत्व सर्वेक्षण नवी दिल्ली यांना कळवणेत आले होते. त्यानुसार त्यांच्या कडून मूर्तीची पाहणी व संवर्धन १६ एप्रिल २०२४ मध्ये करण्यात आले होते.
त्यावेळेच्या सुचनेनुसार देवस्थान व्यवस्थापन समितीच्या वतीने १२ जून रोजी महासंचालक, भारतीय पुरातत्व विभाग नवी दिल्ली (भारत सरकार) यांना मूर्तीची नियमित पाहणी व आवश्यक संवर्धन प्रक्रिया करण्याबाबत कळवले होते. त्यानुसार उद्यापासून मूर्तीची पाहणी व आवश्यक नियमित संवर्धन प्रक्रिया करण्यात येणार आहे.
पर्यायी दर्शन व्यवस्था
त्यामुळे श्री अंबाबाई देवीच्या मूळ मूर्तीचे दर्शन सोमवार ते मंगळवार पर्यंत भाविकांना घेता येणार नाही. या कालावधीमध्ये भाविकांना श्रीं ची उत्सवमूर्ती व श्रीकलश दर्शनासाठी ठेवण्यात येणार असून भाविकांनी पितळी उंबऱ्याच्या बाहेरुन श्रीकलश व श्रींच्या उत्सवमूर्तीचे दर्शन घ्यावे, असे देवस्थान व्यवस्थापन समिती पश्चिम महाराष्ट्र, कोल्हापूर यांनी केले आहे.
