इचलकरंजी येथील स्थानिक गुन्हे शाखेच्या पथकाने पूर्वाश्रमीतील मुंबई येथील मनचेकर टोळीतील गँगस्टर याला रविवारी जेरबंद केले. शशिकांत महादेव बिर्जे (वय ३५, रा. जवाहरनगर, इचलकरंजी) असे त्याचे नाव आहे. त्याच्याकडून पोलिसांनी एक गावठी पिस्तूल, चार जिवंत राऊंड आणि दुचाकी असा १ लाख ४ हजार रुपयांचा मुद्देमाल हस्तगत केला आहे. या बाबत पोलिसांनी असे सांगितले, की पोलीस रेकॉर्ड वरील गुन्हेगार शशिकांत बिर्जे यांचेकडे गावठी पिस्तूल व राउंड बाळगून आहे, अशी माहिती मिळाल्यावरून आज दुपारी दीड वाजता कोल्हापूर रस्त्यावरील कबनूर ओढ्यावर गस्त घालत असता बिर्जे हा मिळून आला. त्याला ताब्यात घेऊन तपासणी केली असता त्यांचेकडे एक पिस्तूल सापडले. त्यावरून पोलिसांनी बिर्जे याला अटक केली. दरम्यान, बिर्जे हा पोलीस रेकॉर्डवरील गुन्हेगार असून त्याच्यावर खून, खुनाचा प्रयत्न, मारामारी आदी गंभीर स्वरूपाचे गुन्हे मुंबई, डोंबिवली, आंबरनाथ या ठिकाणी दाखल आहेत. ही कारवाई सहायक पोलिस निरीक्षक संतोष डोके, महेश कोरे, वैभव दद्दीकर, विजय तळस्कर, रवी कोळी, सागर पाटील आदींनी केली.