कोल्हापूर : कोल्हापूर जिल्ह्यात उद्या गुरुवार ( ३ फेब्रुवारी) पासून करोना निर्बंधांमध्ये शिथिलता करण्यात येणार आहे. याबाबतचे सुधारित आदेश जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष राहुल रेखावार यांनी बुधवारी निर्गमित केले आहेत. यामुळे सामान्य जनता, व्यापारी यांना दिलासा मिळाला आहे. ३० जानेवारी रोजी १८ वर्षांवरील ९० टक्के नागरिकांनी लशीचा पहिला डोस व ७० टक्के नागरिकांनी दोन्ही डोस घेतले असतील अशा जिल्ह्यांना ८ व ९ जानेवारी रोजी जारी केलेल्या आदेशामधून काही प्रमाणात शिथिलता देण्यात आली आहे. त्यामध्ये कोल्हापूर जिल्ह्याचा समावेश आहे. शिथिलता अटी व शर्ती याप्रमाणे- अत्यावश्यक कारणाशिवाय रात्री ११ ते पहाटे ५ वाजेपर्यंत बाहेर फिरण्यासाठी घालण्यात आलेली बंदी शिथिल. कोविड अनुरूप वर्तनाचे पालन होण्यासाठी स्थानिक स्वराज्य संस्थानी पुरेशा कर्मचाऱ्यांची नेमणूक व तपासणी पथके नियुक्त करून पर्यटन स्थळे खुली करण्यास परवानगी. यात्रा व जत्रांचे आयोजन करताना ५० व्यक्तींना फक्त पारंपरिक धार्मिक कार्यक्रम करण्यास परवानगी. महाविद्यालये सुरू होणार जिल्ह्यातील सर्व अकृषी विद्यापीठे व त्यांच्याशी संलग्नित महाविद्यालये, अभिमत विद्यापीठे, स्वयंअर्थसाहाय्यित विद्यापीठे, समूह विद्यापीठे, तंत्रनिकेतन व तत्सम शैक्षणिक संस्थांमधील नियमित वर्ग दिनांक ३ फेब्रुवारी पासून सुरू करण्यास परवानगी दिली आहे. दोन्ही लसीकरण पूर्ण झालेले व करोनाची लक्षणे नाहीत अशा शिक्षक व कर्मचाऱ्यांनी महाविद्यालयामध्ये उपस्थित राहावे. प्रत्येक वर्गात ५० टक्के विद्यार्थी एक दिवसा आड बोलावणे आणि प्रत्येक शैक्षणिक घटक या दोन्ही गटांना शिकविणे.
