कोल्हापूर : शिवाजी विद्यापीठात गांधी अभ्यास केंद्र आणि वाई येथील तर्कतीर्थ लक्ष्मणशास्त्री जोशी प्रतिष्ठान यांच्या संयुक्त विद्यमाने ‘तर्कतीर्थ लक्ष्मणशास्त्री जोशी यांचे विचार आणि कार्य’ या विषयावर १६ व १७ जुलै रोजी आंतरराष्ट्रीय परिषदेचे आयोजन करण्यात आले आहे, ही माहिती परिषदेचे समन्वयक गांधी अभ्यास केंद्राचे डॉ. प्रकाश पवार, डॉ. सुनीलकुमार लवटे, प्रतिष्ठानचे अध्यक्ष पंडित टापरे यांनी दिली आहे.
बुधवारी सकाळी साडेदहा वाजता परिषदेचे उद्घाटन अमेरिकेतील वरिष्ठ शास्त्रज्ञ डॉ. अशोक जोशी यांच्या हस्ते, अमेरिकेतील शास्त्रज्ञ डॉ. अशोक खंडकर,ज्येष्ठ विचारवंत किशोर बेडकीहाळ, कुलगुरू डॉ. दिगंबर शिर्के यांच्या उपस्थितीत होणार आहे. उद्घाटनानंतर तर्कतीर्थ लक्ष्मणशास्त्री जोशी समग्र वाङ्मयाचे संपादक प्राचार्य डॉ. सुनीलकुमार लवटे यांची मराठी विभागाचे प्रमुख डॉ. नंदकुमार मोरे आणि विचारशलाका नियतकालिकाचे संपादक डॉ. नागोराव कुंभार विशेष मुलाखत घेतील.
परिषदेत तर्कतीर्थांविषयीच्या अनुषंगाने विविध नऊ सत्रांमध्ये विश्वकोश निर्मिती मंडळाचे माजी अध्यक्ष दिलीप करंबेळकर, प्रा. राजा दीक्षित, डॉ. रणधीर शिंदे, सर्फराज अहमद, डॉ. श्रीराम पवार डॉ. कौतिकराव ठाले-पाटील, विनोद शिरसाट, डॉ. विश्वास पाटील, डॉ. अशोक चौसाळकर, श्रीनिवास हेमाडे, साहित्य महामंडळाचे अध्यक्ष मिलिंद जोशी, अशोक राणा, साहित्य संमेलनाच्या अध्यक्ष डॉ. तारा भवाळकर आदी सहभागी होणार आहेत. पुस्तके, छायाचित्रे आणि चित्रफिती यांचे विशेष प्रदर्शन, शोधनिबंधांचे सत्रही आयोजिले आहे.
चित्रपट दिग्दर्शक जब्बार पटेल यांचे गुरुवारी दुपारी विशेष सत्रात मार्गदर्शन होणार असून राज्य साहित्य आणि संस्कृती मंडळाचे अध्यक्ष डॉ. सदानंद मोरे यांच्या उपस्थितीत समारोप होणार आहे.
