फेरारीच्या चार्लस लेकलेर्क याने दमदार कामगिरीचे प्रदर्शन करत सलग दुसऱ्यांदा अव्वल स्थान (पोल पोझिशन) पटकावण्याची करामत केली. आता रविवारी रंगणाऱ्या अझरबैजान ग्रां. प्रि. फॉर्म्युला-वन शर्यतीला तो पहिल्या क्रमांकावरून सुरुवात करेल. पात्रता शर्यतीत अपघातामुळे लाल झेंडा दाखवण्यात आला होता. तरीही लेकलेर्क याने १ मिनिट ४१.२१८ सेकंदात सर्वात वेगवान फेरी पूर्ण करत अग्रस्थान पटकावले. मर्सिडिझच्या जगज्जेत्या लुइस हॅमिल्टन याला दुसऱ्या क्रमांकावर समाधान मानावे लागले.
