धोनी बनण्याचा प्रयत्न करु नकोस, माजी ऑस्ट्रेलियन खेळाडूचा पंतला सल्ला

ऑस्ट्रेलियाचा माजी यष्टीरक्षक अ‍ॅडम गिलख्रिस्टनेही पंतला धोनी बनण्याचा प्रयत्न करु नकोस असा सल्ला दिला आहे. तो एका खासगी कार्यक्रमात बोलत होता. “मी पंतला कायम एकच सल्ला देईन, धोनीकडून सर्वकाही शिकून घेण्याचा प्रयत्न कर. फक्त धोनी बनण्याचा प्रयत्न करु नकोस. मैदानात त्याने स्वतःचा खेळ करावा.” याचसोबत गिलख्रिस्टने भारतीय चाहत्यांनीही धोनी आणि पंतची तुलना करु नये असं म्हटलं आहे.

अवश्य वाचा – BLOG : पंतचं अपयश ही कोणाची चूक?

“ऋषभ पंत गुणवान खेळाडू आहे. त्याच्यावर आता अधिक दबाव टाकणं योग्य होणार नाही. इतक्या कमी कालावधीत तो धोनीसारखी कामगिरी करेल अशी अपेक्षाही करणं चुकीचं आहे. मला कधीच कोणत्याही खेळाडूची कोणत्याही खेळाडूसोबत तुलना करणं आवडत नाही. धोनीने आपला खेळ एका वेगळ्या स्तरावर नेऊन ठेवला आहे, एक दिवस त्याच्या तोडीचा खेळाडू येईलच.” गिलख्रिस्टने धोनी आणि पंतच्या तुलनेवर आपलं मत व्यक्त केलं.