माजी क्रिकेटर आणि सुनील गावसकर यांचा मुलगा रोहन गावसकर ट्विटरवरील फोटोमुळे चर्चेत आला आहे. रोहनने मास्टर ब्लास्टर सचिन तेंडुलकर आणि भारताचा माजी सलामीवीर वीरेंद्र सेहवाग यांच्यासोबतचा एक फोटो ट्विटर अकाऊंटवरुन शेअर केला आहे. रोहनने या फोटोला सुंदर असे कॅप्शन दिलयं. भारताच्या दिग्गज सलामीवीरांसोबतचा एक क्षण असा उल्लेख त्याने कॅप्शनमध्ये केलाय. सचिन आणि सेहवागसोबत असा फोटो क्लिक करणारा रोहन एकमेव क्रिकेटर नाही. त्याच्यासोबतच भारताचा माजी फलंदाज हेमांग बदानी यानेही भारताच्या माजी सलामीवीरांसोबतचा एक फोटो शेअर केला आहे. एक मास्टर, एक जादूगर आणि एक प्रेक्षक या कॅप्शनसह बदानीने सचिन आणि सेहवाग या माजी सलामीवीर जोडीसोबतचा फोटो शेअर केलाय.

रोहन आणि हेमांग यांनी पोस्ट केलेले दोन्ही फोटो हे झहीर आणि सागरिका घाटगे यांच्या मेहंदीच्या कार्यक्रमावेळी काढण्यात आले आहेत. आपण जुन्या काळातील असल्याचे सांगण्यासाठी सेहवागने सचिनसोबतचा ब्लॅक अॅण्ड व्हाईट फोटो शेअर केला आहे. सचिनला भेटणे नेहमीच आनंदी क्षण असतो, असा उल्लेख त्याने इन्स्टाग्रामवर शेअर केलेल्या फोटो कॅप्शनमध्ये केला आहे.

भारताचा माजी गोलंदाज झहीर खान आणि बॉलिवूड अभिनेत्री सागरिका घाटगे यांचा विवाह नुकताच पार पडला. त्यानंतर या जोडीने सोमवारी रिसेप्शनचे आयोजन केले होते. या पार्टीमध्ये बॉलिवूड आणि क्रिकेट जगतातील त्यांच्या जवळच्या मित्रांनी हजेरी लावली होती. भारताचा कर्णधार विराट कोहली आणि अभिनेत्री अनुष्का शर्मा यांनी देखील रिसेप्शनला हजेरी लावल्याचे पाहायला मिळाले.