करोनाची लागण झालेला भारताचा महान फलंदाज सचिन तेंडुलकरला गुरुवारी इस्पितळातून घरी पाठवण्यात आले आहे. गेल्या महिन्यात रस्ते सुरक्षा जागतिक क्रिकेट मालिकेत सहभागी झालेल्या सचिनच्या करोना चाचणीचा अहवाल २७ मार्चला सकारात्मक आला होता. त्यानंतर खबरदारी म्हणून २ एप्रिलला त्याला इस्पितळात दाखल करण्यात आले होते. ‘‘मी आताच इस्पितळातून घरी आलो आहे. त्यामुळे मी पुढील काही दिवस विलगीकरणातच असेन. ही विश्रांती माझ्यासाठी महत्त्वासाठी असेल. माझ्यासाठी शुभेच्छा आणि प्रार्थना करणाऱ्या चाहत्यांचा मी आभार आहे,’’ असे घरी परतल्यानंतर सचिनने ‘ट्विटर’वर म्हटले आहे. इस्पितळातील कर्मचाऱ्यांचेही सचिनने यावेळी आभार मानले.
