भारताचा विवेक सागर प्रसाद याची ‘२०१९ मधील उदयोन्मुख आंतरराष्ट्रीय हॉकीपटू’ पुरस्कारासाठी निवड झाली आहे. आंतरराष्ट्रीय हॉकी महासंघाकडून (एफआयएच) सोमवारी विवेकच्या नावाची घोषणा करण्यात आली. विवेकला सर्व राष्ट्रीय संघटनांकडून ५० टक्के, प्रसारमाध्यमांकडून २३ टक्के, चाहत्यांकडून १५.१ टक्के मते मिळाली होती. विवेकने हे यश मिळवताना अर्जेटिनाचा मायको कॅसेला आणि ऑस्ट्रेलियाचा ब्लेक गोव्हर्स यांना मागे टाकले. कॅसेला याला २२ टक्के मते आणि गोव्हर्सला २०.९ टक्के मते मिळाली. सर्वाचे आभार मानताना विवेक म्हणाला की, ‘‘माझ्यासाठी हा सर्वोच्च क्षण आहे. मला हा पुरस्कार मिळवून देण्यासाठी मते देणाऱ्या सर्वाचे आभार मानतो. मला या पुरस्कारामुळे मोठे प्रोत्साहन मिळाले आहे. देशाला आंतरराष्ट्रीय पातळीवर मोठे यश मिळवून देण्यासाठी मी प्रयत्नशील राहीन. माझ्या संघातील सर्व वरिष्ठांचेही आभार मानतो.’’'
