प्रशिक्षकपदासाठी शावीच्या अर्जाने भारतीय फुटबॉल संघटनाच चकित!

बार्सिलोनाकडून ७०० हून अधिक सामने खेळलेल्या शावीची फुटबॉल इतिहासातील सर्वकालीन सर्वोत्कृष्ट मध्यरक्षकांमध्ये गणना केली जाते. अपयशाच्या गर्तेत अडकलेल्या भारतीय फुटबॉलमध्ये शावीने रस घेणे हीच मोठी गोष्ट असली, तरी त्याला सामावून घेण्याचे आर्थिक सामर्थ्य ‘एआयएफएफ’कडे नाही.

स्पेनमधील अनेक प्रशिक्षक आशिया आणि भारतात काम करतात. त्यामुळे आपण अधूनमधून भारतीय लीगमधील सामने पाहतो, असे शावी यांनी मध्यंतरी एका मुलाखतीत सांगितले होते. संधी मिळाल्यावर त्याने भारतीय संघाच्या प्रशिक्षकपदी अर्जही केला. मात्र, त्याचा अर्ज पाहूनच चकित झालेल्या ‘एआयएफएफ’च्या पदाधिकाऱ्यांसमोर खर्चाचा डोंगर उभा राहिला आणि त्यांनी अर्ज थेट फेटाळून लावला.

‘एआयएफएफ’च्या तांत्रिक समितीने अंतिम मुलाखतीसाठी निश्चित केलेल्या नावांमध्ये यापूर्वी प्रशिक्षकपद भूषविलेल्या स्टीफन कॉन्स्टटाईन यांच्यासह स्लोवाकियाच्या स्टीफन टार्कोविच आणि भारताचा माजी खेळाडू खालिद जमिल यांचा समावेश आहे. कॉन्स्टटाईन यांनी यापूर्वी दोन वेळा भारतीय संघाचे प्रशिक्षकपद भूषविले आहे. मात्र, या वेळी ‘एआयएफएफ’ भारतीय उमेदवाराला संधी देण्याबाबत विचार करत असल्याचे समजते.

आर्थिक अडथळा

शावीने २०२१ ते २०२४ या कालावधीत स्पेनमधील बलाढ्य फुटबॉल क्लब बार्सिलोनाचे प्रशिक्षकपद भूषविले. त्यावेळी त्याला ७५ ते ८० कोटींपर्यंतचे वार्षिक मानधन मिळत होते. दुसरीकडे, भारतीय संघाच्या प्रशिक्षकपदापासून नुकतेच दूर करण्यात आलेल्या मानोलो मार्क्वेझ यांना ‘एआयएफएफ’कडून तीन ते चार कोटी इतके वार्षिक मानधन दिले जात होते. या तफावतेमुळेच ‘एआयएफएफ’समोर अडथळा निर्माण झाला.