गुडघ्यावरील शस्त्रक्रियेनंतर भविष्याबाबत निर्णय – स्टोक्स

भवितव्याविषयी बोलताना स्टोक्स म्हणाला, ‘‘माझ्याकडे सध्या कसोटी संघाची जबाबदारी आहे. कसोटी संघाबाबत मला खूप काही करायचे आहे. त्याचवेळी एकदिवसीय क्रिकेट सामन्यात इंग्लंड संघाला पुनरुज्जीवन देण्याविषयी देखील चर्चा सुरू आहे. अर्थात,  या गोष्टीवर निर्णय घेण्यासाठी मला खूप विचार करावा लागेल.’’

हेही वाचा >>>IND vs NED: रोहित ब्रिगेडने भारताला दिली दिवाळी भेट, नेदरलँड्सवरील विजयानंतर पंतप्रधान नरेंद्र मोदी आणि अमित शाहांनी केले कौतुक

‘‘अलीकडच्या काळात क्रिकेट खूप खेळले जात आहे आणि याच एका कारणामुळे मी ताण कमी करण्यासाठी एकदिवसीय क्रिकेटमधून निवृत्त होण्याचा निर्णय घेतला होता. गेल्या एक दीड वर्षांचा विचार केला, तर आता कुठे मी यातून बाहेर पडताना दिसत आहे,’’ असेही स्टोक्सने सांगितले.

स्टोक्स सुरुवातीला गुडघ्याच्या दुखापतीमुळे केवळ एक फलंदाज म्हणूनच खेळत होता. त्यानंतर कंबरेच्या दुखापतीमुळे त्याला विश्वचषक स्पर्धेतील पहिल्या तीन सामन्यांत खेळता आले नाही. यानंतरही इंग्लंडकडून सर्वाधिक धावा करणाऱ्या खेळाडूत स्टोक्स आघाडीवर राहिला आहे. सहा सामन्यात एक शतक आणि दोन अर्धशतकांसह स्टोक्सने ३०४ धावा केल्या. या तीन मोठय़ा खेळी या अखेरच्या तीन सामन्यात झाल्या आहेत.