राजकोट : भारताचा कसोटीपटू चेतेश्वर पुजारा हा १४ मेपासून सुरू होणाऱ्या सौराष्ट्र प्रीमियर लीग या ट्वेन्टी-२० क्रिकेट स्पर्धेत सहभागी होणार आहे. पुजारा हा कसोटीसाठीचा विशेषज्ञ फलंदाज म्हणून ओळखला जातो. त्याने महाराष्ट्रातील नवी मुंबईत होणाऱ्या डी. वाय. पाटील ट्वेन्टी-२० लीगमध्येही यापूर्वी सहभाग नोंदवला आहे. त्या पाश्र्वभूमीवर आता पुजारा हा सौराष्ट्र लीगमध्ये खेळणार असल्याची घोषणा सौराष्ट्र क्रिकेट संघटनेने केली आहे. या विशेष लीगमध्ये पाच संघ सहभागी होणार असून संघमालकांच्या बैठकीत पुजारा कोणत्या संघाकडून खेळणार त्याबाबतचा निर्णय घेतला जाणार आहे. कौंटी क्रिकेटमधून परवानगी मिळाल्यानेच पुजारा या लीगमध्ये खेळू शकणार आहे. पुजाराने भारतासाठी ६८ कसोटी सामने खेळले असून ५४२६ धावा केल्या आहेत.