IND vs PAK, World Cup 2023: चाहत्यांसाठी वाईट बातमी! भारत-पाकिस्तान सामन्यावर पावसाचे सावट, हवामान खात्याने दिली माहिती

अनेक दिवसांपासून चाहते या सामन्याची वाट पाहत होते. सामन्यादरम्यान स्टेडियममध्ये एक लाखाहून अधिक प्रेक्षक उपस्थित राहू शकतात. प्रत्येकाला रोमांचक सामना पाहायचा आहे, परंतु पाऊस त्यांच्या आशा धुळीस मिळवू शकतो. भारतीय हवामान खात्याने (आयएमडी) अहमदाबाद शहर आणि उत्तर गुजरातमध्ये सामन्यादरम्यान हलक्या पावसाची शक्यता वर्तवली आहे.

हवामान खात्याने काय सांगितले?

आयएमडीने शेअर केलेल्या सध्याच्या हवामान अंदाजानुसार, १४ आणि १५ ऑक्टोबर रोजी उत्तर गुजरात आणि अहमदाबादच्या काही भागात हलका पाऊस पडू शकतो. हवामान खात्याने सांगितले की, “गुजरातमध्ये पुढील पाच दिवस हवामान कोरडे राहण्याचा अंदाज आहे. १४ ऑक्टोबर रोजी अहमदाबाद जिल्ह्यात काही ठिकाणी हलका पाऊस पडू शकतो.” अहमदाबादमधील हवामान केंद्राच्या संचालक मनोरमा मोहंती म्हणाल्या, “आकाश ढगाळ असेल. दुसऱ्या दिवशी अहमदाबाद आणि बनासकांठासारख्या उत्तरेकडील जिल्ह्यांमध्ये हलका पाऊस पडेल. साबरकांठा आणि अरवलीत हलका पाऊस पडू शकतो.”

हेही वाचा – IND vs PAK, World Cup 2023: भारत-पाक संघात रंगणार विश्वचषकातील सर्वात मोठा सामना, जाणून घ्या दोन्ही संघांची संभाव्य प्लेइंग इलेव्हन

पावसामुळे सामना रद्द झाला तर?

पावसामुळे सामना रद्द झाल्यास भारत आणि पाकिस्तानला प्रत्येकी एक गुण मिळेल. या सामन्यासाठी कोणताही राखीव दिवस नाही. स्पर्धेतील बाद फेरीच्या सामन्यांसाठी राखीव दिवस आहेत. अशी परिस्थिती उद्भवू नये आणि त्यांना संपूर्ण सामना पाहायला मिळावा, अशी चाहत्यांची इच्छा आहे.