५०० मुलांमध्ये मी एकटी मुलगी खेळायचे, आता तिथे मुलींसाठी स्वतंत्र नेट असतं- जेमिमा रॉड्रिग्ज

तू खेळायला सुरुवात केलीस त्याच्या तुलनेत आता महिला क्रिकेटपटूंसाठी परिस्थिती सुधारली आहे असं म्हणता येईल का? असं नासिर हुसेन यांनी विचारलं.त्यावर ती म्हणाली, ‘शंभर टक्के. अलीकडेच मी शाळेत (सेंट जोसेफ) गेले होते. जेव्हाही मी मुंबईत असते. थोडा वेळ असतो तेव्हा मी तिथे जाण्याचा प्रयत्न करते. कारण माझा प्रवास तिथून सुरू झाला. शाळा, शिक्षक, बाकी स्टाफ यांच्या पाठिंब्यामुळेच इथवर पोहोचू शकले आहे. अनेक मुली आता तिथे खेळत असतात. ते पाहून खूप आनंद होतो, समाधानी वाटतं. तिथे असलेला प्रत्येकजण क्रिकेटचा चाहता आहे. आता ते वूमन्स क्रिकेट फॉलो करतात’.

‘मी ज्या क्लबमधून खेळायचे तिथे आता असंख्य मुली खेळतात. मी सुरूवात केली त्यावेळी ५०० मुलांमध्ये मी एकटीच मुलगी खेळत असायचे. आता तिथे मुलींसाठी स्वतंत्र नेट असतं. हा खूप मोठा बदल आहे. त्या अतिशय स्पर्धात्मक आणि व्यावसायिक पातळीवर खेळतात. त्यांचा संघ आहे. महिला क्रिकेटमध्ये खूप बदल झाले आहेत. वूमन्स प्रीमिअर लीग, द हंड्रेड, बिग बॅश चाहते या स्पर्धा पाहतात. त्यांचा पाठिंबा मोलाचा आहे’. अशा शब्दांत जेमिमाने आपल्या भावना व्यक्त केल्या.

जेमिमा ही भविष्यातली भारताची स्टार खेळाडू असेल असं भाकीत नासिर हुसेन यांनी २०१८ मध्येच वर्तवलं होतं. हुसेन यांचा विश्वास जेमिमाने सार्थ ठरवला आहे.

सेमी फायनलच्या दडपणाच्या लढतीत जेमिमाने ऑस्ट्रेलियासारख्या तुल्यबळ प्रतिस्पर्ध्यांविरुद्ध जेमिमाने शतकी खेळीसह संघाला दिमाखदार विजय मिळवून दिला. जेमिमासाठी वर्ल्डकपची सुरुवात चांगली झाली नव्हती. श्रीलंकेविरुद्धच्या लढतीत तिला भोपळाही फोडता आला नाही. पाकिस्तानविरुद्ध तिने ३२ धावांची छोटेखानी खेळी केली. दक्षिण आफ्रिकेविरुद्धही तिला खातं उघडता आलं नाही. ऑस्ट्रेलियाविरुद्धच्या प्राथमिक फेरीच्या सामन्यात तिने ३३ धावा केल्या. इंग्लंडविरुद्ध तिला संघातून वगळण्यात आलं. न्यूझीलंडविरुद्ध तिने नाबाद ७६ धावांची खणखणीत खेळी साकारली. बांगलादेशविरुद्ध तिला फलंदाजीला यावंच लागलं नाही.