सानिया मिर्झा आणि तिची चीनची साथीदार जी झेंग जोडीला अमेरिकन खुल्या स्पर्धेच्या उपांत्य फेरीत पराभवाला सामोरे जावे लागले. ऑस्ट्रेलियाच्या आठव्या मानांकित अ‍ॅशलेह बार्टी आणि कॅसे डेलाअ‍ॅक्वा जोडीने दहाव्या मानांकित मिर्झा-झेंग जोडीवर ६-२, ६-२ अशी सहज मात केली. दोन्ही सेटमध्ये बार्टी-डेलाअ‍ॅक्वा जोडीने सानिया-झेंग जोडीची सव्‍‌र्हिस तीनदा भेदली. मिश्र दुहेरीत रोमानियाच्या होरिया टेकाऊच्या साथीने खेळताना सानियाचे आव्हान याआधीच संपुष्टात आले आहे. रोहन बोपण्णा, महेश भूपती आणि सानिया मिर्झा या तिघांचेही मिश्र दुहेरीतील आव्हान झटपट संपुष्टात आले.