विजय अमृतराज, लिएण्डर पेस व सानिया मिर्झा यांच्यासारख्या कीर्तिवान खेळाडूंमुळे भारताला टेनिसची वैभवशाली परंपरा लाभली आहे, असे अमेरिकेची माजी जगज्जेती खेळाडू व्हीनस विल्यम्स हिने सांगितले. व्हीनस भारतामध्ये चालू असलेल्या चॅम्पियन्स टेनिस लीग स्पर्धेत सहभागी झाली आहे. ती म्हणाली, ‘‘भारताला अशी वैभवशाली परंपरा पुढे चालविण्याची आवश्यकता आहे. आता पुष्कळ स्पर्धामध्ये भाग घेण्याची संधी भारतीय खेळाडूंना मिळत असते. त्यांनी ही परंपरा टिकवून ठेवण्यासाठी प्रयत्न केले पाहिजेत.’’ ‘‘माझ्या यशात माझी बहीण सेरेना हिचा मोलाचा वाटा आहे. आम्ही दुहेरीत एकत्र खेळत असल्यामुळे माझ्या खेळातील चुका दुरुस्त करण्यासाठी तिच्याकडून खूप मदत होत असते. दुहेरीतील भागीदार नेहमीच एकमेकांबाबत आदर बाळगून असतात,’’ असे व्हिनसने सांगितले.