स्मृती मानधना-हरमनप्रीतच्या शतकी खेळी ठरल्या भारी! भारतीय महिलांचा दक्षिण आफ्रिकेवर थरारक विजय

भारतीय संघाने प्रथम फलंदाजी करताना ३२५ धावांचा डोंगर उभारला. स्मृती मानधना आणि हरमनप्रीत कौर यांनी तिसऱ्या विकेटसाठी केलेली १७१ धावांची भागीदारी महत्त्वपूर्ण ठरली. स्मृतीने १८ चौकार आणि २ षटकारांसह १३६ धावांची मॅरेथॉन खेळी साकारली. हरमनप्रीतने ९ चौकार आणि ३षटकारांसह नाबाद १०३ धावांची दिमाखदार खेळी साकारली. ऋचा घोषने १३ चेंडूत २५ धावा चोपल्या आणि भारतीय संघाने सव्वातीनशेचा टप्पा ओलांडला.

या प्रचंड लक्ष्यासमोर खेळताना दक्षिण आफ्रिकेने विकेट्स गमवायला सुरुवात केली पण लॉरा वॉल्व्हडार्टने १२ चौकार आणि ३ षटकारांसह १३५ धावांची शानदार खेळी केली. क्रमांकावर खेळायला आलेल्या मारिझान कापने ९४ चेंडूत ११ चौकार आणि ३ षटकारांसह ११४ धावांची अविश्वसनीय खेळी साकारली. या दोघींनी स्मृती-हरमनप्रीतप्रमाणे चौथ्या विकेटसाठी १८४ धावांची खंडप्राय भागीदारी रचली. मारिझान बाद झाल्यानंतर भारतीय गोलंदाजांनी शिस्तबद्ध मारा करत पुनरागमन केलं. लॉराने एका बाजूने चिवटपणे लढा दिला. शेवटच्या षटकात आफ्रिकेला ६ चेंडूत ११ धावांची आवश्यकता होती पण पूजा वस्राकरने दोन विकेट्स पटकावत भारताच्या विजयावर शिक्कामोर्तब केलं. दक्षिण आफ्रिकेला अवघ्या चार धावा कमी पडल्या. भारताकडून पूजा आणि दीप्ती शर्मा यांनी प्रत्येकी २ विकेट्स पटकावल्या.

या विजयासह भारतीय संघाने तीन सामन्यांच्या मालिकेत २-० अशी विजयी आघाडी घेतली आहे. पहिल्या लढतीतही स्मृतीने दिमाखदार शतक झळकावलं होतं. भारतीय संघाने त्या लढतीत १४३ धावांनी विजय मिळवला होता. तिसरा सामना १९ तारखेला बंगळुरू इथेच होणार आहे.