Video : पंतचं भन्नाट ‘केक फेशिअल’; धवनचा चिमुरडा झोरावर ठरला बळी

विजयानंतर दिल्लीच्या संघाने केले दमदार सेलिब्रेशन

IPL 2019 KKR vs DC : दिल्लीने कोलकाताच्या मैदानावर झालेल्या सामन्यात कोलकातावर ७ गडी राखून मोठा विजय मिळवला. सलामीवीर शिखर धवनच्या नाबाद ९७ धावांच्या खेळीच्या जोरावर दिल्लीने १७९ धावांचे आव्हान ७ चेंडू राखून पूर्ण केले. कोलकाताने प्रथम फलंदाजी करत २० षटकात ७ बाद १७८ धावा केल्या होत्या. मात्र त्यांच्या गोलंदाजांना या धावसंख्येचा बचाव करता आला नाही.

या सामन्यात शिखर धवनने झंझावाती खेळी केली. त्याने एक बाजू लावून धरली. सुरुवातीला पृथ्वी शॉ आणि त्यानंतर ऋषभ पंतच्या साथीने त्याने धमाकेदार खेळी केली. शिखर धवनला आपल्या टी २० कारकिर्दीतील पहिलेवहिले शतक झळकावण्याची संधी होती. मात्र दुसऱ्या फलंदाजाने विजयी षटकार लगावल्याने त्याला ९७ धावांवर नाबाद रहावे लागले. या खेळीत त्याने ११ चौकार आणि २ षटकार खेचले. या विजयानंतर दिल्लीच्या संघाने दमदार सेलिब्रेशन केले. यावेळी दिल्लीचा यष्टीरक्षक ऋषभ पंत याने सेलिब्रेशनचा केक कापल्यानंतर तोच केक शिखर धवनचा चिमुरडा झोरावर याच्या तोंडाला फासला. याशिवाय, त्याने शिखर धवन आणि इशांत शर्मा यांच्याही तोंडाला केक फासून ‘केक फेशिअल’ केले.

पहा व्हिडीओ –

दरम्यान, १७९ धावांच्या आव्हानाचा पाठलाग करताना सलामीवीर पृथ्वी शॉ झेलबाद झाला आणि दिल्लीला पहिला धक्का बसला. पृथ्वीने १४ धावा केल्या. त्यात २ उत्तुंग षटकारांचा समावेश होता. कर्णधार श्रेयस अय्यरने चाहत्यांचा अपेक्षाभंग केला. केवळ ६ धावा करून तो माघारी परतला आणि दिल्लीला दुसरा धक्का बसला. शिखर धवनच्या साथीने खेळत ऋषभ पंतने दमदार फटकेबाजी केली. पण अर्धशतकाने त्याला हुलकावणी दिली. तो ४६ धावा करून बाद झाला. पण शिखर धवन ९७ धावा करून नाबाद राहिला. तर कॉलिन इन्ग्रॅमने (१४*) विजयी षटकार लगावला.

त्या आधी, कोलकाताकडून सलामीला फलंदाजी करण्याची संधी मिळालेला जो डेण्टली पहिल्या चेंडूवर त्रिफळाचीत झाला. इशांत शर्माने उत्कृष्ट स्विंग गोलंदाजी करत त्याला माघारी धाडले. किमो पॉल याच्या गोलंदाजीवर मिळालेल्या ‘फ्री हिट’वर षटकार लगावत कोलकाताने अर्धशतकी मजल मारली. रॉबिन उथप्पाने अचूक फटका खेळत ‘फ्री हिट’चा उपयोग केला. धडाकेबाज सुरुवात मिळालेला रॉबिन उथप्पा उसळत्या चेंडूवर फटका लगावताना झेलबाद झाला. यष्टिरक्षकाने उंच उडी मारून त्याचा अप्रतिम झेल टिपला. उथप्पाने ४ चौकार आणि १ षटकार लगावत ३० चेंडूत २८ धावा केल्या. शुभमन गिल याने अप्रतिम खेळी साकारत दमदार अर्धशतक झळकावले. पण कोलकाताच्या संघाला तो आनंद फार काळ साजरा करता आला नाही. कारण त्यानंतरच्या षटकातच नितीश राणा त्रिफळाचीत झाला आणि कोलकाताचा तिसरा गडी माघारी परतला. राणाने १२ चेंडूत ११ धावा केल्या.

अर्धशतक पूर्ण केल्यावर फटकेबाजी करण्याच्या प्रयत्नात शुभमन गिल झेलबाद झाला आणि कोलकाताला चौथा धक्का बसला. गिलने ३९ चेंडूत दमदार ६५ धावा केल्या. यात ७ चौकार आणि २ षटकार समाविष्ट होते. कर्णधार दिनेश कार्तिक २ धावांवर बाद झाला आणि कोलकाताला पाचवा धक्का बसला. आंद्रे रसलने नेहमीप्रमाणे फटकेबाजी करत ४५ धावा केल्या. यात ३ चौकार आणि २ षटकार खेचले. क्रेग ब्रेथवेट ६ धावांवर बाद झाला.शेवटच्या टप्प्यात पियुष चावलाच्या ६ चेंडूत १४ धावांच्या जोरावर कोलकाताने १७८ धावांपर्यंत मजल मारली.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

Web Title: Ipl 2019 kkr vs dc video rishabh pant cake facial to shikhar dhawan son zoravar ishant sharma