आयपीएलच्या तेराव्या हंगामात आपला पहिला सामना खेळणाऱ्या सनराईजर्स हैदराबाद संघाला पराभवाचा सामना करावा लागला आहे. अखेरच्या क्षणी फलंदाजांनी केलेल्या हाराकिरीचा फटका हैदराबादला बसला. जॉनी बेअरस्टो आणि मनिष पांडे यांच्या फटकेबाजीमुळे एका क्षणाला सामना हैदराबाद सहज जिंकले असं वाटत असतानाच चहलने एकाच षटकात दोन बळी घेत सामन्याचं पारडं बंगळुरुच्या बाजूने फिरवलं. चहलने बेअरस्टो आणि विजय शंकरला माघारी धाडलं.

मात्र भोपळाही न फोडता माघारी परतलेला विजय शंकर सोशल मीडियावर नेटकऱ्यांच्या निशाण्यावर आला. २०१९ विश्वचषकासाठी अंबाती रायुडूला डावलून विजय शंकरला संधी देण्यात आली होती. तत्कालीन निवड समिती प्रमुख एम.एस.के. प्रसाद यांनी विजय शंकरचा 3D परफॉर्मन्समुळे त्याला स्थान देण्यात आल्याचं सांगितलं होतं. हाच धागा पकडून नेटकऱ्यांनी विजयला ट्रोल केलंय.

पहिल्याच सामन्यात विजय शंकर अपयशी झालेला असताना रायुडूने पहिल्याच सामन्यात आपलं नाणं खणखणीत वाजवून दाखवलं. मुंबईविरुद्धच्या सामन्यात अर्धशतकी खेळी करुन त्याने चेन्नईच्या विजयात महत्वाची भूमिका बजावली.