PBKS IPL 2025 Full Squad: पंजाब किंग्सच्या संघात ४ खेळाडूंच्या किमती १० कोटी पार, लिलावानंतर कसा आहे संघ?

डावखुरा वेगवान गोलंदाज या दुर्मीळ गटाचा प्रतिनिधी असलेल्या टी२० वर्ल्डकपविजेत्या अर्शदीप सिंगसाठी पंजाब किंग्जने राईट टू मॅचचा अधिकार वापरला. लिलावात सलामी करणाऱ्या अर्शदीप सिंगसाठी जोरदार लढाई रंगली. सनरायझर्स हैदराबादने १५ कोटींची बोली लावली. पंजाब किंग्जने राईट टू मॅचचा अधिकार वापरू असं स्पष्ट केलं. अर्शदीप सिंगसाठी १८ कोटी देणार तयार असल्याचं पंजाबने स्पष्ट केलं आणि त्याची घरवापसी पक्की झाली. लिलावापूर्वी झालेल्या रिटेन्शनमध्ये पंजाब संघाने अर्शदीपला रिलीज केलं होतं. विकेट्स पटकावण्यात आणि धावा रोखण्यात माहीर अर्शदीपसाठी जोरदार बोली लागणार हे स्वाभाविक होतं. तसंच झालं. पंजाब दा पुत्तर अर्शदीपला संघात सामील करत पंजाबने आपला गोलंदाजीचा प्रमुख तोच असेल हे सिद्ध केलं.

हेही वाचा – MI IPL 2025 Full Squad: मुंबई इंडियन्सचा संघ लिलावानंतर कसा आहे? अर्जुन तेंडुलकर, बोल्ट, सँटनर विल जॅक्स…

पंजाबने माजी कर्णधार ग्लेन मॅक्सवेलला संघात घेतलं आहे. अष्टपैलू मॅक्सवेलला सूर गवसल्यास पंजाबचं नशीब पालटू शकतं. नवीन प्रशिक्षक रिकी पॉन्टिंग यांच्या पुढाकारामुळे पंजाबने अष्टपैलू मार्कस स्टॉइनसला संघात समाविष्ट केलं आहे. विदर्भवीर अष्टपैलू खेळाडू यश ठाकूर लखनौकडून पंजाबच्या गटात आला आहे. मुंबईसाठी दमदार कामगिरी करणाऱ्या नेहल वढेराला पंजाबने आपल्याकडे ओढून घेतलं आहे.

नवा हंगाम नवे खेळाडू नवा कर्णधार आणि नवे प्रशिक्षक असं काम चालणारा संघ म्हणजे पंजाब किंग्सचा संघ. पंजाब किंग्सचा संघ आयपीएल २०२५ पूर्वी नव्याने संघ बांधणी करणार आहे. पंजाबने रिटेन केलेल्या खेळाडूंमध्ये फक्त दोन खेळाडूंचा समावेश आहे. त्यामध्ये शशांक सिंग याला ५.५ कोटी आणि प्रभसिमरन सिंगला ४ कोटींना संघात कायम ठेवलं आहे. गेल्या काही हंगामात शिखर धवनने पंजाबचं नेतृत्व केलं. मात्र धवनने निवृत्तीचा निर्णय घेतल्यानंतर पंजाब संघाला कर्णधारापासून सुरुवात करावी लागणार आहे. शेवटच्या लिलावात पंजाबाने सॅम करनसाठी तिजोरी रीती केली होती. सॅम करनने धवनला दुखापत झालेली असताना संघाचे नेतृत्वही केलं, पण त्याच्या लौकिकाला साधेचा त्याला खेळ करता आला नाही. त्यामुळे संघाने या हंगामापूर्वी त्याला रिलीज केल आहे.

हेही वाचा – IPL Auction 2025: कोण आहे प्रियांश आर्य? ३० लाख मूळ किंमत असलेल्या खेळाडूसाठी लागली ३ कोटींची बोली

पंजाब किंग्सने या हंगामापूर्वी रिकी पाँटिंगला संघाचा नवा प्रशिक्षक म्हणून नेमलं आहे. आयपीएल २०२५ च्या लिलावात पंजाबचा संघ रिकी पाँटिंगच्या मार्गदर्शनाखाली नव्याने संघ तयार करणार आहे. पंजाब किंग्सचा संघ २०२५ च्या लिलावात १२० कोटींपैकी ११०.०५ कोटी अशा सर्वाधिक पर्ससह लिलावात उतरणार आहे. पंजाब संघाने दोनच खेळाडूंना रिटेन केल्यामुळे त्यांच्याकडे चार राईट टू मॅच कार्ड उपलब्ध आहेत.

हेही वाचा – IPL 2025 Retention: रिटेंशननंतर कोणत्या संघाकडे किती रक्कम शिल्लक? या संघाच्या खात्यात तर तब्बल ११० कोटी

पंजाब किंग्जचा लिलावानंतर संपूर्ण संघ

शशांक सिंग, प्रभसिमरन सिंग, अर्शदीप सिंग (१८ कोटी), श्रेयस अय्यर (२६.७५ कोटी), युझवेंद्र चहल (१८ कोटी), मार्कस स्टॉयनिस (११ कोटी), ग्लेन मॅक्सवेल (४.२० कोटी) , नेहल वढेरा (४.२० कोटी), हरप्रीत ब्रार (१.५० कोटी), विष्णू विनोद (९५ लाख), विजयकुमार विशक (१.८० कोटी), यश ठाकूर (१.६० कोटी), मार्को यान्सन (७ कोटी), जोश इंग्लिस (२.६० कोटी), लॉकी फर्ग्युसन (२ कोटी), अजमतुल्ला उमरझाई (२.४० कोटी), हरनूर पन्नू (३० लाख), कुलदीप सेन (८० लाख), प्रियांश आर्य (३.८० कोटी), ऍरॉन हार्डी (१.२५ कोटी), मुशीर खान (३० लाख), सूर्यांश शेडगे (३ लाख), झेवियर बार्टलेट (८० लाख), प्याला अविनाश (३० लाख), प्रवीण दुबे (३० लाख).