Mumbai Indians vs Royal Challengers Bangalore: आयपीएल २०२३ चा ५४ वा सामना मुंबई इंडियन्स आणि आरसीबी यांच्यात मुंबईच्या वानखेडे स्टेडियमवर खेळवला जाणार आहे. जेव्हा-जेव्हा या दोन्ही संघांमध्ये सामना होतो, तेव्हा चाहत्यांमध्ये मोठी उत्सुकता असते. दोन्ही संघांचा स्वतःचा चाहता वर्ग आहे. प्लेऑफच्या दृष्टीने हा सामना आरसीबी आणि मुंबईसाठी खूप महत्त्वाचा आहे. गेल्या ८ वर्षांपासून वानखेडे स्टेडियमवर आरसीबीला मुंबईविरुद्धचा एक डाग पुसता आलेला नाही. आरसीबीला ८ वर्षापासून विजयाची प्रतिक्षा - मुंबईच्या वानखेडे स्टेडियमवर आरसीबी आणि मुंबई इंडियन्स यांच्यात आतापर्यंत ९ सामने झाले आहेत. त्यापैकी ६ मुंबई संघाने जिंकले आहेत. त्याच वेळी, आरसीबीने केवळ ३ सामने जिंकले आहेत. २०१५ मध्ये वानखेडेवर आरसीबीने मुंबईचा ३९ धावांनी पराभव केला होता. त्यानंतर गेल्या ८ वर्षांपासून आरसीबी संघाला वानखेडे स्टेडियमवर मुंबईला हरवता आलेले नाही. दोन्ही संघांचे हेड टू हेड रेकॉर्ड - आयपीएलमध्ये आतापर्यंत आरसीबी आणि मुंबई इंडियन्स यांच्यात ३१ सामने खेळले गेले आहेत, त्यापैकी मुंबईने १७ आणि आरसीबी संघाने १४ सामन्यांमध्ये विजय मिळवला आहे. पण गेल्या काही काळापासून आरसीबीचा वर्चस्व राहिले आहे. बंगळुरु-मुंबई यांच्यात झालेल्या शेवटच्या ६ सामन्यांबद्दल बोलायचे झाले तर, बंगळुरुने ५ मध्ये विजय मिळवला आहे. त्याचबरोबर मुंबईला केवळ एकच सामना जिंकता आला आहे. दोन्ही संघांच्या विजेतेपदांबद्दल बोलायचे झाले, तर मुंबईने पाच वेळा आयपीएल ट्रॉफी जिंकली आहे. त्याचवेळी आरसीबी संघाला एकही विजेतेपद मिळवता आलेले नाही. हेही वाचा - IPL 2023: पंजाबविरुद्धच्या विजयानंतर केकेआरला मोठा फटका! बीसीसीआयने ‘या’ कारणासाठी नितीश राणावर केली कारवाई विजेत्या संघाचा प्लेऑफचा मार्ग खुला होणार - आयपीएल २०२३ पॉइंट टेबलमध्ये आरसीबीचा संघ सहाव्या क्रमांकावर आहे. त्याचवेळी मुंबई इंडियन्स ८ व्या क्रमांकावर आहे. दोन्ही संघांचे १०-१० गुण आहेत. आजच्या सामन्यात जो संघ विजयी होईल. त्याच्यासाठी प्लेऑफचा रस्ता सोपा असेल. त्याचबरोबर पराभूत होणारा संघ प्लेऑफच्या शर्यतीतून बाहेर पडू शकतो.
