‘एक्सक्लुसिव्ह कंटेंट, व्ह्यूज आणि एंगेजमेंट याच्या नादात तुम्ही क्रिकेटपटू आणि चाहते यांच्यातला विश्वास तोडत आहात’, अशा शब्दात भारताचा कर्णधार आणि आयपीएल स्पर्धेत मुंबई इंडियन्सचा आधारस्तंभ रोहित शर्माने प्रक्षेपणकर्ती कंपनी स्टार स्पोर्ट्सला धारेवर धरलं आहे. एका सोशल मीडिया पोस्टद्वारे रोहितने परखड शब्दात टीका केली आहे.
रोहितने लिहिलं आहे, ‘खेळाडूंच्या आयुष्यातल्या खाजगी गोष्टी जाहीर केल्या जात आहेत. कॅमेरे तुमचं प्रत्येक बोलणं, हावभाव, कृती टिपते आहे. तुम्ही मित्रांबरोबर, घरच्यांबरोबर, संघातील सहकाऱ्यांबरोबर, सरावावेळी जे जे बोलता ते सगळं टिपलं जात आहे. मी बोलत असताना रेकॉर्ड करू नका अशी विनंती करुनही स्टार स्पोर्ट्सने चित्रीकरण केलं. नुसतं चित्रीकरण करुन थांबले नाहीत तर ते प्रसारितही केलं. हा गोपनीयतेचा भंग आहे’.
त्याने पुढे लिहिलं, ‘त्यांना एक्सक्लुसिव्ह कंटेंट हवं आहे. व्ह्यूज हवे आहेत, एंगजेमेंट हवी आहे. पण या सगळ्याच्या नादात तुम्ही चाहते, खेळाडू आणि क्रिकेट यांच्यातला विश्वासाचा धागा तोडत आहात’.
आशा आहे की भविष्यात परिस्थिती सुधारेल असं रोहितने शेवटी म्हटलं आहे.
The lives of cricketers have become so intrusive that cameras are now recording every step and conversation we are having in privacy with our friends and colleagues, at training or on match days.
— Rohit Sharma (@ImRo45) May 19, 2024
Despite asking Star Sports to not record my conversation, it was and was also then…
रोहितच्या पोस्टला मोठ्या प्रमाणावर लाईक्स मिळाले असून, कमेंट्समध्येही लोकांनी त्याच्या बोलण्याला पाठिंबा दिला आहे.
केकेआरचे सहाय्यक प्रशिक्षक अभिषेक नायर हे रोहित शर्माचे मित्र आहेत. मुंबई आणि कोलकाता सामन्याआधी या दोघांदरम्यान झालेलं संभाषण रेकॉर्ड करण्यात आलं होतं. त्यांच्यातला खाजगी संवाद कॅमेऱ्याने टिपला. त्यावरून रोहित शर्मा मुंबई इंडियन्सची साथ सोडणार असे तर्कही लढवण्यात आले.
काही दिवसांपूर्वी रोहित त्याचा जुना मित्र धवल कुलकर्णी आणि सहकाऱ्यांशी बोलत होता. त्याहीवेळा त्याने हात जोडून विनंती केली की रेकॉर्ड करू नका. त्यानंतरही व्हीडिओ रेकॉर्ड करण्यात आला आणि दाखवण्यातही आला.
मुंबई इंडियन्स संघाने हंगामाआधी हार्दिक पंड्याला ताफ्यात समाविष्ट केलं आणि अनपेक्षितपणे कर्णधारपदी नेमण्याचा निर्णय घेतला. रोहितच्या नेतृत्वात ५ जेतेपदं मुंबई इंडियन्स संघाने पटकावली होती. रोहितला अशा पद्धतीने बाजूला करणं चाहत्यांना रुचलं नाही. हार्दिक पंड्याला प्रचंड प्रमाणावर प्रत्यक्ष आणि ऑनलाईन रोषाला सामोरं जावं लागलं. मुंबईची कामगिरीही यथातथाच राहिली. मुंबई इंडियन्सचा संघ गुणतालिकेत तळाच्या स्थानी राहिला.
पुढच्या हंगामाआधी मेगा ऑक्शन होणार असून रोहित शर्मा अन्य संघाकडून खेळण्याची चर्चा सोशल मीडियावर रंगू लागली आहे.
