IND vs ENG: क्रिकेटच्या पंढरीत जो रूटचं विक्रमी शतक! मोठ्या विक्रमात राहुल द्रविडला टाकलं मागे

या सामन्यातील पहिल्या दिवशी जो रूट ९९ धावांवर नाबाद परतला होता. त्यामुळे त्याला दुसऱ्या दिवशी १ धाव घेताच शतक झळकावण्याची संधी होती. रूटने जराही धीर घेतला नाही. दुसऱ्या दिवशी जसप्रीत बुमराह डावाची सुरूवात करण्यासाठी गोलंदाजीला आला. या षटकातील पहिल्याच चेंडूवर रूटने चौकार मारला आणि आपलं शतक पूर्ण केलं. हे भारतीय संघाविरूद्ध त्याचे ११ वे शतक ठरले आहे. यासह त्याने कसोटी क्रिकेटमध्ये भारतीय संघाविरूद्ध खेळताना सर्वाधिक शतकं झळकावण्याच्या रेकॉर्डमध्ये स्टीव्ह स्मिथची बरोबरी केली आहे. दोघांनी भारताविरूद्ध खेळताना ११ शतकं झळकावली आहेत.

या रेकॉर्डमध्ये राहुल द्रविडला टाकलं मागे

कसोटी क्रिकेटमध्ये सर्वाधिक शतकं झळकावण्याचा रेकॉर्ड हा भारताचा माजी फलंदाज सचिन तेंडुलकरच्या नावावर आहे. सचिनने ५१ शतकं झळकावली आहेत. भारतीय संघाविरूद्ध झळकावलेलं हे शतक रूटच्या कसोटी कारकिर्दीतील ३७ वे शतक ठरले आहे. यासह त्याने कसोटी क्रिकेटमध्ये सर्वाधिक शतकं झळकावण्याच्या रेकॉर्डमध्ये राहुल द्रविडला मागे सोडलं आहे. राहुल द्रविडच्या नावे ३६ शतकं झळकावण्याची नोंद आहे. तर स्टीव्ह स्मिथच्या नावे देखील ३६ शतकं झळकावण्याची नोंद आहे. त्यामुळे रूट हा कसोटी क्रिकेटमध्ये सर्वाधिक शतकं झळकावणारा पाचवा फलंदाज ठरला आहे.

कसोटी क्रिकेटमध्ये सर्वाधिक शतकं झळकावणारे फलंदाज

सचिन तेंडुलकर-५१ शतकं

जॅक कॅलिस- ४५ शतकं

रिकी पाँटींग – ४१ शतकं

कुमार संगकारा – ३८ शतकं

जो रूट- ३७ शतकं

राहुल द्रविड- ३६ शतकं

स्टीव्ह स्मिथ- ३६ शतकं

युनूस खान – ३४ शतकं

सुनील गावसकर- ३४ शतकं

ब्रायन लारा- ३४ शतकं

महेला जयवर्धने – ३४ शतकं

केन विल्यमसन- ३३ शतकं

अॅलिस्टर कुक -३३ शतकं

स्टीव वॉ- ३२ शतकं