Ind vs Nz: विराट नाही, रोहितही नाही आणि आता…; कसोटी मालिकेआधीच भारताला मोठा धक्का

आयसीसी टी-२० विश्वचषक स्पर्धेदरम्यान आणि त्यानंतर न्यूझीलंडविरोधात नुकत्याच पार पडलेल्या टी-२० मालिकेमध्ये के. एल. राहुलने तुफान फलंदाजी केली होती. राहुलला चांगली लय गवसली होती. असं असतानाच त्याला दुखापतीमुळे आता संघाबाहेर बसावं लागणार असल्याने संघासमोरील पेच वाढलाय. दरम्यान, के. एल. राहुलच्या जागी संघामध्ये सूर्यकुमार यादवला स्थान देण्यात आलं आहे. बीसीसीआयने यासंदर्भातील घोषणा केली आहे. मात्र सूर्यकुमार यादव सलामीला येण्याची शक्यता कमी आहे.

बीसीसीसीआयच्या सुत्रांनी स्पोर्ट्स तकला दिलेल्या माहितीनुसार के. एल. राहुल मंगळवारी भारतीय संघासोबत ग्रीन पार्क स्टेडियममध्ये उपस्थित राहणार होता. मात्र दुखापत झाल्याने तो सरावाला आला नाही. के. एल. राहुलचे डाव्या पायाचे स्नायू दुखावल्यामुळे त्याला सरावही करता येत नसल्याने तो न्यूझीलंडविरोधातील कसोटी मालिका खेळमार नाहीय. आता राहुल आणि रोहित शर्मा दोघे सलामीवीर मैदानाबाहेर असल्याने शुभमन गिल आणि मयंक अग्रवालच भारताकडून सलामीवीर म्हणून मैदानात उतरण्याची शक्यता आहे. चेतेश्वर पुराजानेही गिल हा अंतिम ११ खेळाडूंमध्ये असेल असं प्रसारमाध्यमांशी बोलताना सांगितलं होतं.

न्यूझीलंडविरोधातील दोन कसोटी सामन्यांच्या या मालिकेमधील पहिला सामना २५ नोव्हेंबरपासून कानपूरच्या मैदानामध्ये खेळवला जाणार आहे. तर दुसरा सामना हा कर्णधार विराट कोहलीच्या नेतृत्वाखाली खेळवला जाणार आहे. हा सामना ३ डिसेंबर ते ७ डिसेंबरदरम्यान मुंबईतील वानखेडे मैदानामध्ये होणार आहे. या सामन्याच्या माध्यमातून पहिल्यांदाच विराट कर्णधार आणि राहुल द्रविड प्रशिक्षक अशी जोडी भारतीय चाहत्यांना पाहायला मिळणार आहे.