“ना फिटनेस, ना स्किल्स…”, पाकिस्तानी चाहत्यांची त्यांच्याच संघावर आगपाखड; भारतीय संघाला पाठिंबा देत म्हणाले…

दरम्यान, भारतीय संघाला पाठिंबा देणाऱ्या एका चाहत्याशी एएनआयने बातचीत केली. यावेळी त्याने सांगितलं की “आमचा संघ भारतीय संघाच्या बरोबरीचा नाही. त्यामुळेच आम्ही भारतीय संघाला पाठिंबा देत आहोत”. हा पाकिस्तानी चाहता भारताची जर्सी परिधान करून आला होता. तो म्हणाला, “आमच्या संघातील खेळाडूंकडे ना फिटनेस आहे, ना त्यांच्याकडे चांगलं कौशल्य आहे. म्हणूनच आम्ही भारतीय संघाला पाठिंबा देत आहोत. कारण भारतीय संघातील खेळाडूंकडे जे कौशल्य आहे त्याची आम्ही बरोबरी करू शकत नाही. आमचा संघ त्यांना पराभूत करू शकत नाही. आमचा संघ दुबळा आहे. आम्हाला खात्री होती की विराट कोहली जो वर्षभरापासून फॉर्मशी झगडतोय तो पाकिस्तानविरुद्धच्या सामन्याद्वारे फॉर्ममध्ये परत येईल आणि शतक देखील ठोकेल. नेमकं तसंच झालं.

भारताचा पाकिस्तानवर दणदणीत विजय

दुबईच्या आंतरराष्ट्रीय क्रिकेट स्टेडियमवर खेळवण्यात आलेल्या या बहुचर्चित सामन्यात भारतीय गोलंदाजांनी पाकिस्तानला २४१ धावांत रोखल्यानंतर भारताने ४२.३ षटकांत ४ गड्यांच्या बदल्यात २४४ धावा करत विजय साकारला. या आव्हानाचा पाठलाग करताना कर्णधार रोहित शर्मा (१५ चेंडूंत २०) व सलामीच्या सामन्यातील शतकवीर शुभमन गिल (५२ चेंडूंत ४६) यांनी भारताला चांगली सुरुवात करून दिली. रोहित व गिल माघारी परतल्यावर विराटने श्रेयस अय्यरच्या (६७ चेंडूंत ५६) साथीने भारताचा डाव सावरला. त्यांनी सुरुवातीला एकेरी-दुहेरी धावांवर भर देत धावफलक हलता ठेवला. या दोघांनी तिसऱ्या गड्यासाठी ११४ धावांची निर्णायक भागीदारी रचत भारताला विजयासमीप नेले. श्रेयस बाद झाल्यानंतर कोहलीने औपचारिकता पूर्ण करताना भारताला विजय मिळवून दिला, शिवाय एकदिवसीय कारकीर्दीतील ५१वे शतकही झळकावले.