Pro Kabaddi Season 6 : यू मुम्बाकडून हरयाणा स्टिलर्सचा धुव्वा

हरयाणाच्या खेळाडूंनी आजच्या सामन्यात पुरती निराशा केली. विकास कंडोलाचा अपवाद वगळता एकही चढाईपटू आणि बचावफळीतला खेळाडू आजच्या सामन्यात आपली छाप पाडू शकला नाही. यंदाच्या हंगामात सर्वात महागडा खेळाडू ठरलेला मोनू गोयतही यू मुम्बाचा कर्णधार फजल अत्राचलीचा शिकार ठरला. या निराशाजनक खेळामुळे हरयाणाचा संघ सामन्यात पुनरागमन करुच शकला नाही.

अवश्य वाचा – Pro Kabaddi Season 6 : उत्तर प्रदेशचे योद्धे तेलगू टायटन्सकडून पराभूत

दुसरीकडे यू मुम्बाच्या खेळाडूंनी अष्टपैलू खेळ केला. चढाईमध्ये अभिषेक सिंहने सर्वाधीक 14 गुणांची कमाई केली. त्याला रोहित बालियान आणि सिद्धार्थ देसाईने 8-8 गुण मिळवत चांगली साथ दिली. या तिन्ही खेळाडूंनी हरयाणाच्या बचावफळीला खिंडार पाडलं, ज्यानंतर हरयाणाचा संघ सावरुच शकला नाही. बचावफळीत कर्णधार फजल अत्राचलीने 7 गुण मिळवले. हरयाणाच्या मुख्य चढाईपटूंना मैदानाबाहेर ठेवण्याची यू मुम्बाची रणनिती या सामन्यात कामी आली. फजलला इतर खेळाडूंचीही चांगली साथ मिळाली.