Badminton Couple Saina Nehwal Parupalli Kashyap: भारताची प्रसिद्ध बॅडमिंटनपटू सायना नेहवाल आणि तिचा पती भारतीय बॅडमिंटनपटू पारूपल्ली कश्यप विभक्त होत असल्याचं सायना नेहवालने स्वत: जाहीर केलं होतं. सायनाने गेल्या महिन्यात पोस्ट शेअर करत माहिती दिली होती. सायना नेहवाल आणि पारूपल्ली कश्यप हे करियरच्या सुरूवातीपासून एकमेकांना ओळखतात आणि बॅडमिंटनच्या कोर्टवर दोघेही प्रेमात पडले होते. पण आता दोघेही पुन्हा एकत्र येणार आहेत.
सायना नेहवाल आणि पारूपल्ली कश्यप यांनी एकत्र बॅडमिंटनचे धडे गिरवले आहेत. सायना आणि कश्यप एकत्र बॅडमिंटनचा सराव करायचे. यादरम्यान त्यांची मैत्री झाली आणि ही मैत्री प्रेमात कशी खुलत गेली हे त्यांनाही कळलं नाही. एक दशकभराचा काळ एकमेकांना डेट केल्यानंतर, दोघांनीही १४ डिसेंबर २०१८ मध्ये लग्न केलं.
२०१८ मध्ये लग्न झाल्यानंतर हे बॅडमिंटनपटू जोडपं वेगळं होणार यावर सायनाने शिक्कामोर्तब केला होता. पण आता तिनेच नवी पोस्ट शेअर करत ते दोघेही पुन्हा एकत्र येण्याचा प्रयत्न करत असल्याचं म्हटलं आहे.
सायना नेहवालने पारूपल्ली कश्यपबरोबरचा फोटो शेअर केला आहे आणि त्याच्या कॅप्शनमध्ये तिने लिहिलं, “कधीकधी नात्यातील दुरावा हा त्या व्यक्तीचं आपल्या आयुष्यात असणं किती महत्त्वाचं आहे याची जाणीव करून देतो. आता आम्ही पुन्हा एकदा एकत्र येण्याचा आणि आयुष्य नव्याने जगण्याचा प्रयत्न करत आहोत.”
सायना आणि ३८ वर्षीय कश्यप गेल्या ७ वर्षांपासून एकत्र आहेत. दोघांनीही २०१८ मध्ये त्यांच्या लग्नाची घोषणा करून सर्वांना आश्चर्यचकित केलं होतं, कारण बराच काळ या दोन्ही स्टार्सनी त्यांचं नातं मीडिया आणि चाहत्यांच्या नजरेपासून दूर ठेवलेलं. दोघांची भेट हैदराबादमधील दिग्गज भारतीय बॅडमिंटनपटू पुलेला गोपीचंद यांच्या अकादमीत झाली, जिथे दोघेही दिग्गज प्रशिक्षकाच्या देखरेखीखाली प्रशिक्षण घेत होते. इथूनच त्यांची लव्हस्टोरी सुरू झाली. सायना नेहवालच्या जीवनावर आलेल्या चित्रपटामध्ये या दोघांची लव्हस्टोरीही दाखवली आहे. सायनाच्या पोस्टमध्ये अनेकांनी कमेंट करत त्यांना शुभेच्छा दिल्या आहेत.
