भारताची सानिया मिर्झा आणि तिची अमेरिकेची सहकारी बेथनी मटेक-सँड्स यांचे सोनी खुल्या मायामी मास्टर्स टेनिस स्पर्धेतील आव्हान उपान्त्यपूर्व फेरीतच संपुष्टात आले. महिला दुहेरीच्या या लढतीत सानिया-बेथनी यांना जागतिक क्रमवारीतील अव्वल क्रमांकाच्या सारा एरानी आणि रॉबर्टा व्हिन्सी या जोडीने सरळ सेटमध्ये पराभूत केले.  सातव्या मानांकित सानिया-बेथनी जोडीने प्रत्येक सेटमध्ये तीन वेळा सर्विस गमावल्यामुळे त्यांना १-६, ४-६ असा पराभव पत्करावा लागला. सानिया-बेथनी जोडीने आक्रमक सुरुवात करत पहिल्याच गेममध्ये प्रतिस्पध्र्याची सर्विस भेदली. पण एरानी-व्हिन्सी जोडीने सव्याज परतफेड करत सानिया-बेथनी यांची सर्विस मोडीत काढली. अवघ्या २४ मिनिटांत पहिला सेट जिंकत एरानी-व्हिन्सी जोडीने वर्चस्व गाजविले. दुसऱ्या सेटमध्ये सानिया-बेथनी यांनी जोमाने पुनरागमन करत पहिला गेम जिंकला. सुरेख खेळाचे प्रदर्शन करून त्यांनी दुसऱ्या सेटमध्ये ४-२ अशी आघाडी घेतली. पण त्यांना हा आनंद फार काळ टिकविता आला नाही. एरानी-व्हिन्सी जोडीने सलग चार गेम जिंकत उपान्त्य फेरीतील आपले स्थान निश्चित केले. त्यांना उपान्त्य फेरीत लिसा रेमंड आणि लॉरा रॉबसन यांच्याशी लढत द्यावी लागेल.