दुबई : भारताच्या सानिया मिर्झा हिने दुबई डय़ुटी फ्री चषक टेनिस स्पर्धेतील महिलांच्या दुहेरीत अंतिम फेरी गाठली. तिने बेथानी मॅटेक-सँड्स हिच्या साथीत अनास्ताशिया रोदिओनोवा (ऑस्ट्रेलिया) व कारा ब्लॅक (झिम्बाब्वे) यांच्यावर ६-२, ७-५ असा विजय मिळविला. सव्वा तास चाललेल्या या सामन्यात सानिया व बेथानी यांना दुसऱ्या सेटमध्ये विजय मिळविण्यासाठी झुंजावे लागले. त्यांनी फोरहँडच्या ताकदवान फटक्यांबरोबरच प्लेसिंगचा सुरेख खेळ केला. या जोडीने जानेवारीत ब्रिस्बेन आंतरराष्ट्रीय स्पर्धेत अजिंक्यपद पटकाविले होते.