भारतीय क्रिकेट नियामक मंडळाच्या अध्यक्षपदाच्या कारभारापासून दूर ठेवण्याच्या सर्वोच्च न्यायालयाच्या आदेशात बदल करण्यासाठी एन. श्रीनिवासन यांनी दाखल केलेली याचिका गुरुवारी सर्वोच्च न्यायालयाने फेटाळून लावली. न्यायमूर्ती बी. एस. चौहान आणि ए. के. सिकरी यांच्या खंडपीठाने ही याचिका फेटाळून लावली आहे. ‘‘या प्रकरणात तुम्ही प्रतिवादी आहात. प्रत्येक सुनावणीच्या वेळी तुम्ही हजर होता. तुमच्या उपस्थितीतच सर्वोच्च न्यायालयाने हे आदेश दिले आहेत. त्यामुळे त्यात बदल करता येणार नाहीत,’’ असे खंडपीठाने म्हटले आहे.
